ایجنسیاں
سرینگر/ ۲۰ ؍اگست
جموں و کشمیر اینٹی کرپشن بیورو (اے سی بی) نے جمعرات کو سری نگر میونسپل کارپوریشن (ایس ایم سی) کی ایک جونیئر بلڈنگ انسپکٹر کو مبینہ طور پر ۱۰ ہزار روپے رشوت طلب کرنے اور وصول کرنے کے الزام میں گرفتار کر لیا۔
حکام کے مطابق سری نگر کے ایس ایم سی وارڈ نمبر ۲۸ میں جونیئر بلڈنگ انسپکٹر کے طور پر تعینات غزالہ اختر کو شکایت کنندہ سے رشوت کی رقم وصول کرتے ہوئے رنگے ہاتھوں گرفتار کیا گیا۔
اے سی بی کے مطابق شکایت کنندہ نے الزام عائد کیا تھا کہ غزالہ اختر نے دو تعمیراتی ڈھانچوں کی تعمیر کے سلسلے میں غیر قانونی رقم کا مطالبہ کیا، حالانکہ متعلقہ مجاز اتھارٹی سے تعمیر کے لیے ضروری اجازت پہلے ہی حاصل کی جا چکی تھی۔
ایجنسی نے بتایا کہ افسر نے مبینہ طور پر جاری تعمیراتی کام میں رکاوٹیں پیدا کیں اور شکایت کنندہ پر رشوت دینے کے لیے دباؤ ڈالنے کی غرض سے معاملے کو طول دینے کی کوشش کی۔
شکایت موصول ہونے کے بعد اے سی بی نے خفیہ طور پر اس کی تصدیق کی، جس کے دوران الزامات بادی النظر میں درست پائے گئے۔ اس کے بعد انسدادِ بدعنوانی قانون ۱۹۸۸ کی دفعہ ۷ کے تحت اے سی بی پولیس اسٹیشن سری نگر میں ایف آئی آر درج کی گئی۔
تحقیقات کے دوران ایک ٹریپ ٹیم تشکیل دی گئی اور غزالہ اختر کو شکایت کنندہ سے ۱۰ ہزار روپے طلب کرتے اور وصول کرتے ہوئے گرفتار کر لیا گیا۔
حکام نے بتایا کہ رشوت کی رقم آزاد گواہوں کی موجودگی میں ان کے قبضے سے برآمد کر لی گئی، جس کے بعد انہیں حراست میں لے لیا گیا۔
اے سی بی نے کہا کہ معاملے کی مزید تحقیقات جاری ہے۔
۔۔۔۔۔۔۔
