ہندوستان نے اپنے 600 ویں ٹیسٹ میں کامیابی حاصل کرکے سیریز میں 0-1 کی برتری حاصل کرلی

گال، 19 اگست (یواین آئی) مانَو سوتھر کی چھ وکٹ اور پرسدھ کرشنا کی دو وکٹوں کی شاندار گیندبازی کی بدولت ہندوستان نے بدھ کو پہلے ٹیسٹ کے پانچویں دن کھانے کے وقفے کے بعد سری لنکا کی دوسری اننگز 206 رنز پر سمیٹ کر میچ 165 رنز سے جیت لیا۔ یہ ہندوستان کے 600ویں ٹیسٹ میں تاریخی فتح ہے۔ اس جیت کے ساتھ ہندوستان نے دو ٹیسٹ میچوں کی سیریز میں 1-0 کی برتری حاصل کرلی۔ دیودت پڈیکل کو 167 رنز کی شاندار سنچری کے لیے پلیئر آف دی میچ قرار دیا گیا۔
سری لنکا نے چوتھے دن کے 4 وکٹ پر 84 رنز سے آگے کھیلنا شروع کیا۔ کپتان دھننجیا ڈی سلوا اور سونال دینوشا نے محتاط بلے بازی کرتے ہوئے اسکور 156 رنز تک پہنچایا، لیکن رویندر جڈیجا نے 56ویں اوور میں دھننجیا کو 59 رنز پر آؤٹ کرکے ہندوستان کو پہلی کامیابی دلائی۔ اس کے بعد پرسدھ کرشنا نے نروشن ڈکویلا کو 10 رنز پر وکٹ کیپر رشبھ پنت کے ہاتھوں کیچ کراکے سری لنکا کی چھٹی وکٹ حاصل کی۔
کھانے کے وقفے کے بعد مانَو سوتھر نے سنچری کی جانب بڑھ رہے سونال دینوشا کو 84 رنز پر آؤٹ کیا۔ انہوں نے 128 گیندوں پر آٹھ چوکے اور ایک چھکا لگایا۔ اس کے بعد سوتھر نے پربھات جے سوریا اور لہیرو کمارا کو بغیر کھاتہ کھولے پویلین بھیج دیا اور 78ویں اوور میں کیشرا نونتا کو 20 رنز پر آؤٹ کرکے سری لنکا کی اننگز 206 رنز پر ختم کردی۔
ہندوستان کی جانب سے پہلی اننگز میں چار وکٹ لینے والے مانَو سوتھر نے دوسری اننگز میں 23.4 اوورز میں 55 رنز دے کر چھ وکٹ حاصل کیے۔ پرسدھ کرشنا نے دو جبکہ محمد سراج اور رویندر جڈیجا نے ایک، ایک وکٹ لیا۔ سوتھر نے دونوں اننگز میں مجموعی طور پر 10 وکٹیں حاصل کیں۔
سیریز کا دوسرا ٹیسٹ 28 اگست کو کولمبو میں کھیلا جائے گا۔
مختصر اسکور: ہندوستان پہلی اننگز 462، دوسری اننگز 193؛ سری لنکا پہلی اننگز 284، دوسری اننگز 206 رنز۔