سری نگر؍۱۷؍ اگست
جموں و کشمیر کے لیفٹیننٹ گورنر منوج سنہا نے پیر کے روز پلوامہ میں ’ملاقات‘ پروگرام میں شرکت کی۔ سیو یوتھ، سیو فیوچر فاؤنڈیشن کی جانب سے منعقد کیا جانے والا یہ پروگرام بین المذاہب مکالمے، ہم آہنگی اور ہندوستان کے مشترکہ ورثے کے تحفظ کے لیے وقف تھا۔
اپنے خطاب میں لیفٹیننٹ گورنر نے کہا کہ مکالمہ محض الفاظ کا تبادلہ نہیں بلکہ دلوں کے درمیان پل بنانے، اعتماد پیدا کرنے اور امن و خوشحالی کی راہ ہموار کرنے کا ذریعہ ہے۔
رِگ وید کے اشلوک ’’سنگچھدھوم، سم ودھدھوم، سم وو منانسی جانتام‘‘ کا حوالہ دیتے ہوئے انہوں نے کہا کہ ساتھ چلنا، ساتھ گفتگو کرنا اور ایک دوسرے کے لیے دلوں میں جگہ بنانا ہندوستانی تہذیبی روایت کی روح ہے۔ انہوں نے کہا کہ تنوع کمزوری نہیں بلکہ ملک کی سب سے بڑی طاقت اور قیمتی وراثت ہے، جس کا تحفظ باہمی اعتماد اور احترام کے ذریعے ہی ممکن ہے۔
منوج سنہا نے کہا، ’’تمام مذاہب اور عقائد کے لیے باہمی اعتماد اور احترام ہماری طرزِ زندگی کا لازمی حصہ رہا ہے۔ ہمارے پیارے بھارت کی تہذیب نے۶ہزار سال قبل ہمیں ایک انتہائی خوبصورت پیغام دیا کہ ساتھ چلیں، ساتھ گفتگو کریں اور ایک دوسرے کے لیے اپنے دلوں میں جگہ بنائیں۔‘‘
سنہا نے کہا کہ ہندوستان کی سرزمین نے صدیوں سے دنیا بھر کے مذاہب، ثقافتوں اور روایات کا خیرمقدم کیا ہے اور انہیں اپنی تہذیبی ساخت کا حصہ بنایا ہے۔ انہوں نے کہا کہ مختلف روایات کا یہ امتزاج آج ’وسودھیو کٹمبکم‘ یعنی پوری دنیا ایک خاندان ہے، کے فلسفے اور کشمیر یت کی روح میں نظر آتا ہے، جو یہ سکھاتی ہے کہ انسان کی حقیقی شناخت مذہب یا برادری کے لیبل میں نہیں بلکہ اس کے کردار اور انسانیت میں ہے۔
لیفٹیننٹ گورنر نے سیو یوتھ، سیو فیوچر فاؤنڈیشن کی کوششوں کو سراہتے ہوئے منشیات کے استعمال کے خلاف کام کرنے اور بھائی چارے کو فروغ دینے والے نوجوان رضاکاروں کی تعریف کی۔ انہوں نے زور دیا کہ اس نوعیت کی سرگرمیوں کو وسیع پیمانے پر فروغ دیا جانا چاہیے۔
انہوں نے کہا، ’’ایسے اقدامات کو بہت بڑے پیمانے پر وسعت دینے کی ضرورت ہے۔ میرا ماننا ہے کہ حقیقی امن کا ایک مطلب یہ بھی ہے کہ وہ اس وقت شروع ہوتا ہے جب ہم ایک دوسرے کو سمجھنا شروع کرتے ہیں۔ اس اعتبار سے یہاں ہماری موجودگی محض ایک سماجی اجتماع نہیں۔ ملاقات کا حقیقی مفہوم ایک دوسرے کو سننا، سمجھنا اور احترام کرنا ہے اور جہاں دلوں کے درمیان دوری ہو وہاں مکالمے کی جانب پہلا قدم اٹھانا ہے۔‘‘
منوج سنہا نے کہا کہ ’ملاقات‘ جیسے پروگراموں کے ذریعے ایسا ماحول پیدا کیا جانا چاہیے جہاں تمام مذاہب، عبادت کے مختلف طریقوں اور معاشرے کے تمام طبقات سے تعلق رکھنے والے لوگ ایک ساتھ بیٹھیں، مسائل پر گفتگو کریں، حقیقت کا جائزہ لیں اور سچائی کو سمجھنے کی کوشش کریں۔ انہوں نے کہا کہ جہاں لوگوں کے درمیان کوئی دیوار کھڑی کردی گئی ہو، وہاں سب کو مل کر اسے گرانے کی کوشش کرنی چاہیے۔
لیفٹیننٹ گورنر نے مستقبل کے لیے چھ نکاتی روڈ میپ بھی پیش کیا۔ انہوں نے انتظامیہ اور معاشرے کے تمام طبقات پر زور دیا کہ اسکولوں، کالجوں اور کمیونٹی مراکز میں باقاعدہ بین المذاہب مکالمے کو ادارہ جاتی شکل دی جائے تاکہ نوجوانوں میں باہمی سمجھ بوجھ کو فروغ ملے۔
ایل جی نے نوجوانوں کو امن کے سفیر بنانے پر زور دیتے ہوئے کہا کہ نوجوان ثقافتی تبادلے، اجتماعی خدمت اور ماحولیات کے تحفظ سے متعلق اقدامات کی قیادت کریں۔ انہوں نے مشترکہ ورثے کے طور پر تاریخی اور ثقافتی مقامات کے تحفظ کو بھی اہم قرار دیا اور کہا کہ اس مقصد کے لیے عوام اور انتظامیہ کو مشترکہ طور پر کام کرنا چاہیے۔
لیفٹیننٹ گورنر نے نوجوانوں میں ڈیجیٹل خواندگی کو فروغ دینے اور غلط معلومات کے پھیلاؤ کا مقابلہ کرنے کی ضرورت پر بھی زور دیا تاکہ عوامی اعتماد کو محفوظ رکھا جاسکے۔انہوں نے کہا، ’’یہ عوام اور انتظامیہ کی مشترکہ ذمہ داری ہے کہ نوجوانوں کو ایسی تعلیم فراہم کی جائے جو انہیں سوال کرنے کا حوصلہ دے، ایسی ٹیکنالوجی تک رسائی فراہم کی جائے جو انہیں ترقی کی طرف لے جائے اور ایسا کردار تشکیل دیا جائے جو ان میں حب الوطنی اور قوم سازی کا جذبہ پیدا کرے۔‘‘
ایل جی نے ترقی پسند معاشرے کے لیے سماجی انصاف اور مساوی مواقع کی اہمیت کو بھی اجاگر کیا اور تمام متعلقہ فریقوں پر زور دیا کہ تعلیم، روزگار، صحت اور انصاف کی سہولتیں تمام شہریوں کو غیر جانب دارانہ نظام کے ذریعے فراہم کی جائیں۔
اپنی چھٹی اور آخری تجویز میں منوج سنہا نے مختلف طبقات کی نمائندگی پر مشتمل ولیج پیس کمیٹیوں کے قیام کی تجویز دی تاکہ ہمدردی، انسانیت اور ترقی کو مزید مضبوط بنایا جاسکے۔
لیفٹیننٹ گورنر نے کہا کہ حکومتیں قوانین بنا سکتی ہیں اور انتظامیہ نظام فراہم کرسکتی ہے، لیکن حقیقی ہم آہنگی عوام خود پیدا کرتے ہیں۔ انہوں نے انتظامی افسران پر زور دیا کہ وہ شہریوں کی سلامتی، ترقی کے یکساں مواقع اور فلاحی اسکیموں پر مؤثر عمل درآمد یقینی بنائیں۔
اس موقع پر لیفٹیننٹ گورنر نے اسپورٹس اسٹیڈیم پلوامہ سے ترنگا یاترا کو بھی جھنڈی دکھا کر روانہ کیا۔ انہوں نے ’ہر گھر ترنگا‘ اور دیگر قومی یکجہتی پروگراموں میں پلوامہ کے عوام کی پرجوش شرکت کو بھی سراہا۔
(ڈی آئی پی آر )
