دہلی یونیورسٹی کے نارتھ کیمپس میں این ایس یو آئی کا ترنگا مارچ، سینکڑوں طلباء نے لیا حصہ

نئی دہلی، 14 اگست (یو این آئی) نیشنل اسٹوڈنٹس یونین آف انڈیا (این ایس یو آئی) نے جمعہ کے روز دہلی یونیورسٹی کے نارتھ کیمپس میں ترنگا مارچ کا اہتمام کیا۔ این ایس یو آئی کے قومی صدر ونود جاکھڑ کی قیادت میں منعقدہ مارچ میں سینکڑوں کارکنوں اور طلباء نے حصہ لیا۔
اس دوران طلباء نے قومی پرچم ہاتھوں میں لے کر آزادی، اتحاد، جمہوریت اور آئین کی قدروں کی حمایت میں نعرے لگائے۔ مارچ کے دوران جلسے سے خطاب کرتے ہوئے مسٹر جاکھڑ نے کہا کہ ہندوستان ایک جمہوری ملک ہے اور یونیورسٹیوں میں بھی جموریت کی قدروں کی حفاظت اور انہیں مضبوط کیا جانا چاہیے۔ انہوں نے کہا کہ یونیورسٹیاں جمہوری معاشرے کی بنیاد ہیں، جہاں طلباء کو بغیر کسی خوف کے اپنی بات رکھنے، سوال پوچھنے، خیالات کا اظہار کرنے اور بحث و مباحثے میں حصہ لینے کی آزادی ملنی چاہیے۔
مسٹر جاکھڑ نے کہا کہ یونیورسٹیاں صرف تعلیم حاصل کرنے کے مراکز نہیں ہیں، بلکہ نوجوانوں کو جمہوریت، آئینی حقوق، مساوات اور اختلافِ رائے کے احترام کا سبق بھی سکھاتی ہیں۔ انہوں نے کہا کہ صحت مند یونیورسٹی کے ماحول میں بات چیت اور مختلف خیالات کے احترام کو فروغ دیا جانا چاہیے۔
انہوں نے کہا کہ جمہوریت صرف انتخابات تک محدود نہیں ہے۔ ہر طالب علم کو اپنی بات کہنے، شرکت کرنے اور اپنی آواز سنے جانے کا حق ہونا چاہیے۔ انہوں نے کہا کہ کیمپس ایسی جگہ بنی رہنے چاہئیں، جہاں مختلف خیالات کا باہمی وجود ہو اور طلباء بغیر کسی ڈر کے اپنی جائز تشویشات اٹھا سکیں۔
رام جس چوک پر مارچ کے اختتام کے دوران طلباء نے آزادی، مساوات، اخوت، آئین پسندی اور جمہوری شراکت کے اصولوں کے تئیں اپنے عزم کو دہرایا