سرینگر/۲۵جولائی
ضلع رام بن کے رامسو علاقے میں سرینگر‘جموں شاہراہ پر اتوار کے روز پیش آنے والے ایک دلدوز سڑک حادثے میں زخمی ہونے والی ایک خاتون کے یہاں ایک ہسپتال میں دم توڑنے کے ساتھ مہلوکین کی تعداد بڑھ کر چھ ہوگئی۔
بتادیں کہ رامسو کے نزدیک قومی شاہراہ پر اتوار کو شادی کی پارٹی کو لے جانے والی ایک گاڑی ڈرائیور کے کنٹرول سے باہر ہوکر ایک گہری کھائی میں جا گری تھی جس کے نتیجے میں پانچ مسافر از جان جبکہ کچھ زخمی ہوئے تھے ۔
سرکاری ذرائع نے بتایا کہ زخمیوں میں سے ایک خاتون اتوار کی شام دیر گئے شیر کشمیر انسٹی ٹیوٹ آف میڈیکل سائنسز صورہ سری نگر میں زخموں کی تاب نہ لاکر دم توڑ گئی۔
جاں بحق خاتون کی شناخت ۴۵سالہ نازہ بیگم زوجہ محمد اقبال ساکن نیل تحصیل رامسو کے بطور ہوئی ہے ۔انہوں نے کہا کہ اس حادثے میں زخمی ہونے والی دو خواتین گورنمنٹ میڈیکل کالج اننت ناگ میں زیر علاج ہیں۔
دریں اثنا ضلع انتظامیہ رام بن نے واقعے پر افسوس کا اظہار کرتے ہوئے کہا کہ متاثرین کے لواحقین کو روڈ ایکسیڈنٹ وکٹم فنڈ کے تحت ریلیف دیا جائے گا جس کا پچاس فیصدی حصہ فوری طور واگذار کیا جائے گا
