شاہ سے ملے موریہ،عوامی فلاحی اسکیموں، دیہی ترقی اور بنیادی ڈھانچے سے جڑے کام اور موجودہ سیاسی صورتحال پر کی گفتگو

نئی دہلی 13 اگست (یو این آئی) اتر پردیش کے نائب وزیرِ اعلیٰ کیشو پرساد موریہ نے وزیرِ داخلہ امت شاہ سے ملاقات کر کے ریاست میں عوامی فلاحی اسکیموں، دیہی ترقی اور بنیادی ڈھانچے سے جڑے کام اور موجودہ سیاسی صورتحال پر گفتگو کی۔
مسٹر موریہ اور مسٹر شاہ کے درمیان بدھ کے روز یہاں ہوئی میٹنگ تقریباً آدھے گھنٹے جاری رہی۔ ذرائع سے ملی اطلاع کے مطابق دونوں رہنماؤں نے اس دوران اتر پردیش کے آنے والے اسمبلی انتخابات کی حکمتِ عملی، ریاست کی سیاسی صورتحال اور بدلتے سماجی توازن پر تفصیلی گفتگو کی۔ ذرائع کے مطابق، میٹنگ میں کانگریس اور سماج وادی پارٹی کی جانب سے نوجوانوں، خصوصاً ‘جین زی’ ووٹروں کو متوجہ کرنے کی حکمتِ عملی کا توڑ نکالنے کے معاملے پر بھی غور و خوص ہوا۔
مسٹر موریہ نے مسٹر شاہ کے ساتھ ہوئی ملاقات کی تصویر سوشل میڈیا پلیٹ فارم ‘ایکس’ پر جاری کی اور لکھا، "ہمیں مرکزی وزیرِ داخلہ اورامدادباہمی مسٹر امت شاہ جی سے خیرسگالی ملاقات کرنے اور ان کی رہنمائی حاصل کرنے کا شرف حاصل ہوا۔”
قابلِ ذکر ہے کہ گزشتہ دنوں یہاں جنتر منتر پر ہوئے طلباء کے احتجاج اور نوجوانوں سے جڑے مسائل پر اپوزیشن جس طرح سے جارحانہ نظر آ رہا ہے، اس کے جواب میں بی جے پی کی حکمتِ عملی کے تعلق سے بھی گفتگو کی گئی۔ خیال کیا جا رہا ہے کہ نوجوانوں کے درمیان پارٹی کی رسائی بڑھانے اور انہیں براہِ راست جوڑنے کے لیے خصوصی روڈ میپ تیار کیا جا رہا ہے۔
ذرائع نے بتایا کہ میٹنگ میں ریاست میں جاری عوامی فلاحی اسکیموں، دیہی ترقی اور بنیادی ڈھانچے سے جڑے کام کی پیشرفت کا بھی جائزہ لیا گیا۔ ریاست کی سیاسی صورتحال پر مرکزی قیادت کو فیڈ بیک دیا اور آگے کی حکمتِ عملی کے لیے رہنمائی حاصل کی۔
مسٹر موریہ نے مسٹر شاہ کے علاوہ کئی دیگر رہنماؤں سے بھی ملاقات کی۔ انہوں نے ‘ایکس’ پر لکھا، "اپنا قیمتی وقت دینے کے لیے بہت بہت شکریہ! نئی دہلی میں مرکزی وزیر کنجراپو رام موہن نائیڈو، مرکزی وزیرِ مملکت توکھن ساہو، راجیہ سبھا رکنِ پارلیمنٹ امرپال موریہ، رکنِ پارلیمنٹ ارون گوول اور ڈاکٹر سنجے جیسوال، مدھیہ پردیش کے سیدھی اسمبلی حلقے کی ایم ایل اے ریتی پاٹھک اور سابق رکنِ پارلیمنٹ پرتاپ سمہا سے خیرسگالی ملاقات کی۔”