مودی کل آئی آئی ٹی دہلی کی 57ویں تقسیمِ اسناد تقریب میں شرکت کریں گے

نئی دہلی، 7 اگست (یو این آئی) وزیر اعظم نریندر مودی ہفتہ کو انڈین انسٹی ٹیوٹ آف ٹکنالوجی (آئی آئی ٹی) دہلی کی 57ویں تقسیمِ اسناد تقریب میں بطور مہمان خصوصی شرکت کریں گے اور ڈگریاں حاصل کرنے والے 587 پی ایچ ڈی محققین سمیت 3,000 سے زائد فارغ التحصیل طلبہ سے خطاب کریں گے۔
نمایاں تعلیمی کارکردگی کا اعتراف کرتے ہوئے وزیر اعظم ہونہار طلبہ کو ادارے کے سب سے باوقار اعزازات سے نوازیں گے، جن میں صدر جمہوریہ گولڈ میڈل، ڈائریکٹر گولڈ میڈل، شنکر دیال شرما گولڈ میڈل اور پرفیکٹ ٹین گولڈ میڈل شامل ہیں۔
جدید ترین تحقیق اور مصنوعی ذہانت کو فروغ دینے کے لیے حکومت کے عزم کو مزید اجاگر کرتے ہوئے وزیر اعظم آئی آئی ٹی دہلی کے سونی پت کیمپس میں قائم مصنوعی ذہانت سے چلنے والی اعلیٰ کارکردگی کی سپر کمپیوٹنگ سہولت ’پرم پرگیہ‘ کا افتتاح بھی کریں گے۔ یہ جدید ترین مرکز مصنوعی ذہانت، ڈیٹا سائنس، جدید کمپیوٹنگ اور بین الشعبہ جاتی تحقیق کے شعبوں میں ادارے کی صلاحیتوں میں نمایاں اضافہ کرے گا۔