تُمّی ڈی ہیٹی بیراج کی اونچائی 150 میٹر کرنے کا مطالبہ، ریڈی نے پاٹل سے کی ملاقات

نئی دہلی، 05 اگست (یو این آئی) تلنگانہ کے وزیر اعلیٰ اے ریونت ریڈی نے بدھ کے روز قومی دارالحکومت میں مرکزی وزیر برائے جل شکتی سی آر پاٹل سے ملاقات کر کے ریاست کے آبپاشی منصوبوں، بالخصوص تمی ڈی ہیٹی بیراج سے جڑے زیرِ التوا مسائل پر تبادلہ خیال کیا۔
اس دوران وزیر اعلیٰ ریڈی کے ساتھ ریاست کے وزیرِ آبپاشی این اتم کمار ریڈی اور اراکینِ پارلیمنٹ بھی موجود تھے۔ میٹنگ میں مسٹر ریڈی نے مرکزی وزیر پاٹل سے درخواست کی کہ وہ مہاراشٹر حکومت کے ساتھ بات چیت کے لیے مداخلت کریں تاکہ تمی ڈی ہیٹی بیراج کی اونچائی پر طویل عرصے سے زیرِ التوا تنازع کا حل نکالا جا سکے۔ وزیر اعلیٰ نے بتایا کہ مہاراشٹر حکومت نے تمی ڈی ہیٹی بیراج کی تعمیر کے لیے 148 میٹر کی اونچائی کو منظوری دی ہے۔ انہوں نے مرکزی وزیر سے گزارش کی کہ وہ مہاراشٹر کو 150 میٹر کی اونچائی پر بیراج کی تعمیر کے لیے رضامند کرنے کی کوشش کریں۔
مسٹر ریڈی نے کہا کہ اگر بیراج کی اونچائی 150 میٹر کی جاتی ہے، تب بھی ڈوبنے والا علاقہ 1,000 ہیکٹر سے کم رہے گا۔ انہوں نے زور دے کر کہا کہ اس سے ماحولیاتی اور بحالی سے متعلق اثرات محدود رہیں گے، جبکہ اس منصوبے کے فائدے کہیں زیادہ ہوں گے۔ وزیر اعلیٰ نے مرکزی وزیر کو یہ بھی بتایا کہ تمی ڈی ہیٹی بیراج کی تعمیر سے گریوٹی کے ذریعے پانی کی فراہمی ممکن ہو سکے گی۔ اس پہل سے مہنگی لفٹ آبپاشی کے منصوبوں پر ہونے والے بھاری اخراجات سے بچا جا سکے گا اور ریاست میں آبپاشی کے ساتھ ساتھ پینے کے پانی کی دستیابی بھی مضبوط ہوگی۔