کٹھوعہ میں دو مکانات مسمار، سرینگر میں۱۰غیر منقولہ جائیدادیں ضبط
ویب ڈیسک
سرینگر؍۲۰ جولائی
جموں و کشمیر کے ضلع کٹھوعہ میں پیر کے روز سول انتظامیہ اور پولیس نے مشترکہ کارروائی کرتے ہوئے منشیات کی اسمگلنگ میں ملوث دو حقیقی بھائیوں کے دو رہائشی مکانات اور ایک مویشی خانے کو مسمار کر دیا۔ پولیس کے مطابق ان غیر قانونی تعمیرات کی مجموعی مالیت ساڑھے تین کروڑ روپے سے زائد ہے۔
پولیس کے ترجمان نے بتایا کہ مسمار کیے گئے ڈھانچے مرہین تحصیل کے سپرال پین گاؤں میں گلزار عرف ’داؤ‘ اور اس کے بھائی فرمان علی کی ملکیت تھے، جنہوں نے سرکاری اراضی پر غیر قانونی طور پر یہ تعمیرات کھڑی کی تھیں۔انہوں نے بتایا کہ دونوں ملزمان منشیات کی اسمگلنگ اور دیگر مجرمانہ سرگرمیوں سے متعلق متعدد ایف آئی آرز میں مطلوب ہیں۔
ترجمان کے مطابق یہ انہدامی کارروائی سول اور پولیس انتظامیہ کی موجودگی میں حکومت کی جانب سے منشیات کے ناسور کے خلاف جاری مہم کے تحت انجام دی گئی۔انہوں نے کہا کہ اس کارروائی کا واضح پیغام ہے کہ منشیات کی اسمگلنگ میں ملوث کسی بھی شخص کو این ڈی پی ایس (نارکوٹک ڈرگز اینڈ سائیکو ٹروپک سبسٹینسز) ایکٹ کے تحت جرم سے حاصل شدہ آمدنی کے ذریعے سرکاری اراضی پر غیر قانونی تعمیرات قائم کرنے کی اجازت نہیں دی جائے گی۔
ضلع انتظامیہ اور کٹھوعہ پولیس نے ضلع کو منشیات سے پاک بنانے کے اپنے عزم کا اعادہ کرتے ہوئے خبردار کیا کہ منشیات فروشوں اور اس غیر قانونی کاروبار میں ملوث تمام افراد کے خلاف آئندہ بھی سخت قانونی کارروائیاں جاری رہیں گی۔
دریں اثنا سرینگر پولیس نے این ڈی پی ایس ایکٹ کی دفعات کے تحت بدنام زمانہ منشیات فروشوں کی تقریباً۸ کروڑ روپے مالیت کی۱۰ غیر منقولہ جائیدادیں ضبط کر لی ہیں۔
حکام کے مطابق این ڈی پی ایس ایکٹ کی دفعہ۶۸ ایف کے تحت نوہٹہ پولیس اسٹیشن نے تحقیقات کے دوران منشیات کی اسمگلنگ سے حاصل ہونے والی آمدنی سے خریدی گئیں جائیدادیں ضبط کیں:
حکام کے مطابق ضبط کی گئیں ان تمام جائیدادوں کی مجموعی مالیت تقریباً۸ کروڑ روپے ہے۔ تحقیقات کے دوران یہ ثابت ہوا کہ یہ اثاثے منشیات کی غیر قانونی اسمگلنگ سے حاصل ہونے والی آمدنی سے خریدے گئے تھے۔ این ڈی پی ایس ایکٹ کی متعلقہ دفعات کے تحت ان جائیدادوں کی ضبطی کا مقصد منشیات فروشوں کے مالیاتی ڈھانچے کو تباہ کرنا اور انہیں غیر قانونی تجارت سے حاصل ہونے والے فوائد سے محروم کرنا ہے۔
سرینگر پولیس نے ایک بار پھر نشہ مکت جموں و کشمیر ابھیان کے تحت اپنے عزم کا اعادہ کرتے ہوئے کہا کہ منشیات فروشوں اور اس غیر قانونی نیٹ ورک سے وابستہ تمام عناصر کے خلاف سخت قانونی کارروائیاں آئندہ بھی جاری رہیں گی۔ پولیس کے مطابق ایسے اقدامات کا مقصد صرف ملزمان کے خلاف مقدمات چلانا ہی نہیں بلکہ منشیات کے کاروبار کی معاشی بنیادوں کو بھی مکمل طور پر ختم کرنا ہے تاکہ معاشرے کو محفوظ، صحت مند اور منشیات سے پاک بنایا جا سکے۔
