ڈی آئی پی آر
سرینگر؍۱۷ جولائی
جموں و کشمیر حکومت نے جمعہ کو محکمۂ اطلاعات میں بڑے پیمانے پر رد و بدل کرتے ہوئے ضلعی اطلاعاتی افسران (ڈی آئی اوز) اور ترقی کے منتظر افسران سمیت۱۶ افسران کے تبادلوں اور نئی تعیناتیوں کے احکامات فوری طور پر نافذ کر دیے۔
کمشنر/سیکریٹری محکمۂ اطلاعات آر ایلائس واز (آئی اے ایس) کی جانب سے جاری ایک حکومتی حکم نامے کے مطابق یہ تبادلے انتظامی مفاد میں عمل میں لائے گئے ہیں۔
حکم نامے کے مطابق شوکت حسین گنی کو ضلع شوپیاں سے تبدیل کر کے ضلع کولگام کا ضلعی اطلاعاتی افسر (ڈی آئی او) مقرر کیا گیا ہے، جبکہ ایرم عزیز کو بڈگام سے محکمۂ اطلاعات و تعلقات عامہ (ڈی آئی پی آر) میں اطلاعاتی افسر کی خالی اسامی پر تعینات کیا گیا ہے۔
راجندر کمار ڈنگرا کو کلچرل آفیسر جموں مقرر کیا گیا ہے، جس کے بعد موہت شرما کو اس عہدے کی اضافی ذمہ داری سے فارغ کر دیا گیا ہے۔
ابھمنیو سنگھ، جو ضلع کشتواڑ کی اضافی ذمہ داری بھی سنبھال رہے تھے، کو آئندہ احکامات تک ڈائریکٹر، پبلک ریلیشنز (کے بی آئی)، نئی دہلی کے سپرد کر دیا گیا ہے۔ تاہم ان کی تنخواہ محکمۂ اطلاعات و تعلقات عامہ میں پروگرام اینڈ کوآرڈی نیشن ایگزیکٹو کی خالی اسامی سے ادا کی جائے گی۔
اسی طرح عادل منظور وانی کو بانڈی پورہ سے تبدیل کر کے ضلع کپواڑہ کا ضلعی اطلاعاتی افسر مقرر کیا گیا ہے۔
ترقی کے منتظر افسران میں راجندر پال سنگھ، گلشن سمبریا اور مجیب احمد گنائی کو محکمۂ اطلاعات و تعلقات عامہ میں ایڈیٹر کے عہدوں پر تعینات کیا گیا ہے۔ گلشن سمبریا، جو اس وقت نئی دہلی میں ڈیپوٹیشن پر تعینات ہیں، آئندہ احکامات تک ڈپٹی ڈائریکٹر اطلاعات (کے بی آئی) کے دفتر میں بطور ایڈیٹر اپنی خدمات انجام دیتے رہیں گے۔
گلشن آراء کو کشمیر میں اسسٹنٹ ڈائریکٹر اطلاعات (اشتہارات) کی ذمہ داری سونپی گئی ہے، جبکہ ان کی تنخواہ ایڈیٹر کی خالی اسامی سے ادا کی جائے گی۔شبیر احمد بھٹ کو فیلڈ پبلسٹی آفیسر کشمیر تعینات کیا گیا ہے، جس کے بعد عبدالرقیب بھٹ کو اس عہدے کی اضافی ذمہ داری سے فارغ کر دیا گیا ہے۔
اس کے علاوہ گرپریت سنگھ، لیاقت علی میر، محمد اویس گرکو، نتیہ پال سنگھ اور پرویز احمد لون کو بالترتیب کٹھوعہ، بڈگام، بانڈی پورہ، رام بن کے ضلعی اطلاعاتی افسران اور اطلاعاتی افسر (یوتھ)، کشمیر مقرر کیا گیا ہے۔
سجاد احمد شاہ کو ضلع شوپیاں کا ضلعی اطلاعاتی افسر تعینات کیا گیا ہے، جبکہ انہیں ضلع راجوری کی اضافی ذمہ داری بھی سونپی گئی ہے۔
حکم نامے میں واضح کیا گیا ہے کہ گلشن آراء، جو اس وقت پے لیول۸ میں خدمات انجام دے رہی ہیں، انہیں اسسٹنٹ ڈائریکٹر کے عہدے پر تعیناتی کی بنیاد پر دیگر سینئر افسران پر ترقی کے سلسلے میں کوئی ترجیحی حق حاصل نہیں ہوگا۔
حکومت نے حکم دیا ہے کہ تمام متعلقہ افسران کو ان کی موجودہ تعیناتیوں سے فوری طور پر فارغ تصور کیا جائے گا۔
