ندی نالوں اور لینڈ سلائیڈنگ والے علاقوں سے دور رہنے کی ہدایت
ایجنسیاں
سرینگر؍۱۱ جولائی
محکمۂ موسمیات نے جموں و کشمیر میں آئندہ تین روز کے دوران شدید بارشوں کی پیش گوئی کرتے ہوئے لوگوں کو احتیاط برتنے کی ہدایت دی ہے۔
محکمۂ موسمیات کے مطابق۱۱؍اور۱۲ جولائی کو جموں و کشمیر میں اکثر مقامات پر بارش ہونے کا امکان ہے۔ اس کے بعد بارش کی شدت میں قدرے کمی متوقع ہے اور۱۳ سے۱۶ جولائی تک مختلف مقامات پر وقفے وقفے سے بارشیں ہونے کی پیش گوئی کی گئی ہے۔ تاہم۱۱؍اور۱۲جولائی کو بالخصوص پہاڑی علاقوں میں بعض مقامات پر موسلادھار بارش کا امکان ظاہر کیا گیا ہے۔
دریں اثنا، بھارتی محکمۂ موسمیات (آئی ایم ڈی) کی تازہ ترین پیش گوئی کے پیش نظر ضلع کشتواڑ انتظامیہ نے۱۴ جولائی تک موسم سے متعلق ایڈوائزری جاری کرتے ہوئے ضلع بھر میں ہلکی سے درمیانی درجے کی بارش، گرج چمک، آسمانی بجلی اور تیز ہواؤں کے امکانات کے پیش نظر عوام سے چوکس رہنے اور حساس علاقوں سے دور رہنے کی اپیل کی ہے۔
ایڈوائزری کے مطابق پیش گوئی کی مدت کے دوران ضلع کے بالائی اور پہاڑی علاقوں میں ہلکی سے درمیانی درجے کی بارش متوقع ہے۔ انتظامیہ نے خاص طور پر دریاؤں، ندی نالوں اور لینڈ سلائیڈنگ سے متاثرہ علاقوں کے قریب رہنے والے افراد کو ہدایت دی ہے کہ وہ آبی ذخائر سے دور رہیں، غیر ضروری نقل و حرکت سے گریز کریں اور موسم کی صورتحال بہتر ہونے تک تمام حفاظتی احتیاطی تدابیر پر سختی سے عمل کریں۔
ڈپٹی کمشنر کشتواڑ نے محکمۂ ریونیو، محکمۂ تعمیرات عامہ (آر اینڈ بی)، مکینیکل انجینئرنگ، پی ایم جی ایس وائی، جے پی ڈی سی ایل، جل شکتی، محکمۂ صحت و طبی تعلیم، آبپاشی و فلڈ کنٹرول، این ایچ آئی ڈی سی ایل اور بارڈر روڈز آرگنائزیشن (بی آر او) سمیت تمام متعلقہ محکموں کو ہائی الرٹ رہنے کی ہدایت دی ہے۔ تمام افسران اور فیلڈ عملے کو کسی بھی موسمی ہنگامی صورتحال کی صورت میں فوری کارروائی اور ضروری خدمات کی جلد بحالی کے لیے ہر وقت تیار رہنے کا حکم دیا گیا ہے۔
انتظامیہ نے ضلع کے تمام تحصیلداروں کو بھی ہدایت جاری کی ہے کہ جانی نقصان، املاک کو نقصان، سڑکوں کی بندش یا موسم سے متعلق کسی بھی واقعے کی فوری اطلاع ڈپٹی کمشنر کے دفتر کو دیں تاکہ بروقت امدادی اور بچاؤ کارروائیاں عمل میں لائی جا سکیں۔
ہنگامی صورتحال سے نمٹنے کے لیے ڈپٹی کمشنر کے دفتر میں قائم ضلع کنٹرول روم کو فعال کر دیا گیا ہے، جو چوبیس گھنٹے خدمات انجام دے گا۔
ضلع انتظامیہ نے عوام سے اپیل کی ہے کہ وہ چوکس رہیں، انتظامیہ کے ساتھ تعاون کریں، محکمۂ موسمیات کی سرکاری ہدایات پر عمل کریں اور موسم معمول پر آنے تک سیلاب سے متاثرہ علاقوں، دریاؤں کے کناروں اور لینڈ سلائیڈنگ کے خطرے والے مقامات کی جانب سفر سے گریز کریں۔
