امرناتھ یاتریوں کی گاڑی جموںسرینگر شاہراہ پر الٹ گئی‘۶ زخمی
سرینگر؍۱۰ جولائی
جنوبی کشمیر کے ضلع کولگام میں جمعہ کے روز جموں۔سرینگر قومی شاہراہ پر نامعلوم گاڑی کی ٹکر سے ایک کمسن لڑکی جاں بحق ہوگئی، جبکہ حادثے کے بعد ڈرائیور موقع سے فرار ہونے میں کامیاب ہوگیا۔
سرکاری حکام کے مطابق یہ حادثہ قاضی گنڈ کے ویسو علاقے میں کے پی کالونی کے نزدیک قومی شاہراہ پر پیش آیا، جہاں ایک نامعلوم گاڑی نے لڑکی کو ٹکر مار دی۔
حادثے کے فوراً بعد زخمی لڑکی کو علاج کے لیے گورنمنٹ میڈیکل کالج (جی ایم سی) اننت ناگ منتقل کیا گیا، جہاں ابتدائی طبی امداد کے بعد اسے مزید بہتر علاج کے لیے شیرِ کشمیر انسٹی ٹیوٹ آف میڈیکل سائنسز (سکمز) صورہ ریفر کیا گیا۔
تاہم سکمز صورہ میں ڈاکٹروں نے اسے مردہ قرار دے دیا۔
متوفیہ کی شناخت خوشبو جان دختر بلال احمد وگے ساکن بہی باغ، یاری پورہ، ضلع کولگام کے طور پر ہوئی ہے۔
ادھر پولیس نے واقعے کا نوٹس لیتے ہوئے مقدمہ درج کر لیا ہے اور حادثے میں ملوث نامعلوم گاڑی اور فرار ڈرائیور کی شناخت کے لیے تحقیقات شروع کر دی ہے۔
اس دوران جموں و کشمیر کے ضلع ادھم پور میں جمعہ کے روز جموں۔سرینگر قومی شاہراہ پر امرناتھ یاتریوں کو لے جانے والی ایک گاڑی حادثے کا شکار ہو گئی، جس کے نتیجے میں چھ یاتری زخمی ہو گئے، جن میں ایک کی حالت تشویشناک بتائی جا رہی ہے۔
سرکاری حکام کے مطابق یہ حادثہ ادھم پور۔چنینی شاہراہ پر ٹولڈی نالہ کے قریب اس وقت پیش آیا جب پہلگام بیس کیمپ کی جانب جا رہی یاتریوں کی گاڑی بے قابو ہو کر سڑک سے پھسل گئی اور الٹ گئی۔
تمام زخمی یاتری مدھیہ پردیش کے ضلع ریوا کے بیکنٹھ پور علاقے کے رہنے والے ہیں۔ حادثے کے فوراً بعد سی آر پی ایف، فوج، سول ڈیفنس، ٹریفک پولیس اور جموں و کشمیر پولیس کے اہلکار موقع پر پہنچے اور زخمیوں کو بچا کر گورنمنٹ میڈیکل کالج (جی ایم سی) ادھم پور منتقل کیا۔
لیفٹیننٹ گورنر منوج سنہا نے بتایا کہ زخمیوں میں سے ایک یاتری کی حالت تشویشناک ہونے کے باعث اسے جی ایم سی جموں منتقل کر دیا گیا ہے، جبکہ دیگر پانچ زخمیوں کی حالت مستحکم ہے اور ان کا علاج جی ایم سی ادھم پور میں جاری ہے۔
سنہا نے سوشل میڈیا پلیٹ فارم ایکس پر ایک پوسٹ میں کہا’’ادھم پور کے ٹولڈی نالہ کے قریب مدھیہ پردیش کے ضلع ریوا سے تعلق رکھنے والے امرناتھ یاتریوں کی گاڑی کے حادثے کی اطلاع موصول ہوئی ہے۔ یہ عقیدت مند مقدس امرناتھ غار کے درشن کے لیے پہلگام بیس کیمپ جا رہے تھے کہ ان کی گاڑی سڑک سے پھسل گئی‘‘۔
ایل جی نے کہا کہ انہوں نے ڈویژنل کمشنر جموں، ڈپٹی کمشنر ادھم پور اور جی ایم سی جموں و جی ایم سی ادھم پور کے طبی حکام کو ہدایت دی ہے کہ زخمی یاتریوں کو بہترین ممکنہ طبی سہولیات فراہم کی جائیں۔
لیفٹیننٹ گورنر نے کہا’’میں بھگوان شیو سے زخمی یاتریوں کی جلد صحت یابی کے لیے دعا گو ہوں‘‘۔
اس دوران ڈپٹی انسپکٹر جنرل پولیس (ادھم پور۔ریاسی رینج) شیو کمار، سینئر سپرنٹنڈنٹ آف پولیس امرت پال سنگھ، ڈپٹی کمشنر منگا شیرپا اور سی آر پی ایف کمانڈنٹ منوج سیکون نے جی ایم سی ادھم پور کا دورہ کر کے زخمی یاتریوں کی عیادت کی۔ ضلعی انتظامیہ نے انہیں ہر ممکن مدد فراہم کرنے کا یقین دلایا۔
ادھر مرکزی وزیر ڈاکٹر جتیندر سنگھ نے بھی بتایا کہ حادثے کی اطلاع ملتے ہی انہوں نے ڈپٹی کمشنر ادھم پور منگا شیرپا سے بات کی۔
سنگھ نے ایکس پر اپنی پوسٹ میں کہا’’ابھی ابھی ڈپٹی کمشنر ادھم پور منگا شیرپا سے بات ہوئی۔ مدھیہ پردیش سے امرناتھ یاترا پر آنے والی ایک نجی گاڑی جموں۔سرینگر قومی شاہراہ پر ٹولڈی نالہ کے قریب حادثے کا شکار ہو گئی ہے۔ زخمیوں کو ہر ممکن امداد فراہم کی جا رہی ہے اور میرا دفتر مسلسل انتظامیہ کے رابطے میں ہے۔‘‘
