ایل جی کی جعلی رجسٹریشن میں ملوث افراد کیخلاف کارروائی کی ہدایت
ڈی آئی پی آر
سرینگر؍۹ جولائی
جموں و کشمیر کے لیفٹیننٹ گورنر منوج سنہا نے جمعرات کو کہا کہ اس سال اب تک شری امرناتھ یاترا میں گزشتہ برس کے مقابلے زیادہ عقیدت مند شریک ہوئے ہیں، جو مرکز کے زیر انتظام علاقے میں سیاحت کے لیے ایک خوش آئند اور مثبت اشارہ ہے۔
لیفٹیننٹ گورنر نے جعلی رجسٹریشن میں ملوث افراد کے خلاف سخت قانونی کارروائی کرنے کی بھی ہدایت دی۔
سنہا نے سری نگر کے پنتھا چوک میں قائم یاترا ٹرانزٹ کیمپ اور یاتری نواس کا دورہ کیا اور جاری سالانہ شری امرناتھ یاترا کے لیے کیے گئے انتظامات کا جائزہ لیا۔
ایل جی نے اس موقع پر متعلقہ افسران اور یاتریوں سے بات چیت کی، انہیں فراہم کی جانے والی سہولیات کے بارے میں معلومات حاصل کیں اور حکام کو ہدایت دی کہ بھگوان شیو کے ہر عقیدت مند کو چوبیس گھنٹے بہترین دیکھ بھال اور تمام ضروری سہولیات فراہم کی جائیں۔
سنہا نے کہا’’گزشتہ ایک ہفتے کے اعداد و شمار سے ظاہر ہوتا ہے کہ اس سال شری امرناتھ جی یاترا میں گزشتہ برس کے مقابلے زیادہ عقیدت مند شریک ہوئے ہیں۔ یہ اضافہ نہ صرف ہماری روحانی وراثت کے لیے باعثِ برکت ہے بلکہ جموں و کشمیر میں سیاحت کے لیے بھی ایک مثبت علامت ہے، جس سے مقامی معیشت کو نئی رفتار مل رہی ہے‘‘۔
لیفٹیننٹ گورنر نے کہا کہ وہ چاہتے ہیں کہ جموں و کشمیر کی دستکاری اور ہینڈلوم مصنوعات ملک بھر میں پہنچیں اور ہر یاتری کے گھر میں اس منفرد وراثت کو جگہ ملے۔
سنہا نے کہا’’اس سے ہمارے ہنرمندوں کی حوصلہ افزائی ہوگی اور ’ایک ضلع، ایک مصنوعات‘ مہم کے جذبے کو بھی تقویت ملے گی، جو عقیدے، ثقافت اور خوشحالی کو ایک دوسرے سے جوڑتی ہے‘‘۔
لیفٹیننٹ گورنر نے مختلف محکموں کی جانب سے یاتریوں کی سہولت اور تحفظ کے لیے کیے گئے انتظامات کا جائزہ لیا، جن میں رہائش، صفائی ستھرائی، سیکورٹی، طبی سہولیات، پینے کے پانی کی فراہمی، بجلی، آگ سے بچاؤ کے انتظامات اور دیگر بنیادی خدمات شامل تھیں۔
ایل جی نے افسران سے کہا’’رجسٹریشن سے لے کر رہائش اور کھانے تک کسی بھی یاتری کو کسی قسم کی پریشانی کا سامنا نہیں ہونا چاہیے۔ جموں و کشمیر میں ان کے قیام کو روحانی طور پر خوشگوار اور ہر لحاظ سے آرام دہ بنانا ہم سب کی مشترکہ ذمہ داری ہے‘‘۔
سنہا نے ضلعی انتظامیہ، تمام متعلقہ محکموں، شری امرناتھ جی شرائن بورڈ، پولیس، سیکورٹی فورسز اور دیگر متعلقہ اداروں کی مربوط کوششوں کو سراہا۔
لیفٹیننٹ گورنر نے اس بات پر زور دیا کہ یاترا کے دوران ہجوم کے مؤثر انتظام، رجسٹریشن کے عمل کو آسان اور شفاف بنانے اور یاتریوں کو بروقت معلومات فراہم کرنے کے لیے تمام متعلقہ ادارے باہمی تال میل اور مسلسل نگرانی برقرار رکھیں۔
