ایجنسیاں
سرینگر؍۸ جولائی
جموں کشمیر کے سابق نائب وزیر اعلیٰ مظفر حسین بیگ کی اہلیہ اور بارہمولہ ضلع ترقیاتی کونسل (ڈی ڈی سی) کی سابق چیئرپرسن سفینہ بیگ بدھ کے روز باقاعدہ طور پر برسرِاقتدار جماعت نیشنل کانفرنس میں شامل ہو گئی ہیں۔
سفینہ نے نیشنل کانفرنس کے صدر ڈاکٹر فاروق عبداللہ، وزیر اعلیٰ عمر عبداللہ اور پارٹی کی دیگر سینئر قیادت کی موجودگی میں پارٹی کی رکنیت اختیار کی۔ ان کی نیشنل کانفرنس میں شمولیت کی چہ مگوئیاں اس وقت تیز ہو گئی تھیں جب چند روز قبل انہوں نے بارہمولہ میں نیشنل کانفرنس کے ایک اجلاس میں شرکت کی تھی، جہاں ان کے قریبی رشتہ دار اور پارٹی کے موجودہ ایم ایل اے جاوید بیگ بھی موجود تھے۔
پیشہ سے وکیل، سفینہ نے۲۰۲۰ کے ڈی ڈی سی انتخابات میں بارہمولہ سے بطور آزاد امیدوار کامیابی حاصل کی تھی۔ بعد ازاں، پیپلز کانفرنس اور اپنی پارٹی کی حمایت سے وہ ضلع بارہمولہ کی پہلی ڈی ڈی سی چیئرپرسن منتخب ہوئیں۔وہ اور ان کے شوہر مظفر بیگ کچھ وقت کے لیے سجاد لون کی قیادت والی پیپلز کانفرنس سے وابستہ رہے اور لوک سبھا انتخابات میں ان کی انتخابی مہم کا حصہ بھی بنے، تاہم بعد میں اس جوڑے نے پیپلز کانفرنس سے اپنی راہیں جدا کر لیں۔
سفینہ کی نیشنل کانفرنس میں شمولیت کو وادی، بالخصوص شمالی کشمیر میں پارٹی کے تنظیمی ڈھانچے کے لیے ایک بڑی کامیابی کے طور پر دیکھا جا رہا ہے۔ نیشنل کانفرنس کے دونوں اعلیٰ رہنماؤں (فاروق عبداللہ اور عمر عبداللہ) نے پارٹی میں ان کا گرمجوشی سے استقبال کیا اور ان کی شمولیت کو تنظیم کی توسیع اور مضبوطی کے لیے ایک انتہائی اہم قدم قرار دیا۔
