سرینگر؍ ۷ جولائی
جنوبی کشمیر کے ہمالیائی سلسلے میں واقع مقدس امرناتھ غار میں جاری۵۷ روزہ سالانہ امرناتھ یاترا کے پانچویں روز منگل کو۲۸ہزار۳۵ عقیدت مندوں نے قدرتی طور پر بننے والے برفانی شیو لنگ کے درشن کیے، جس کے ساتھ ہی یاترا شروع ہونے کے بعد اب تک درشن کرنے والے یاتریوں کی مجموعی تعداد ایک لاکھ۱۳ ہزار۸۰۰ سے تجاوز کر گئی ہے۔
سرکاری حکام کے مطابق سطح سمندر سے تقریباً۳۸۸۰ میٹر کی بلندی پر واقع مقدس غار میں یاتریوں کی آمد کا سلسلہ مسلسل جاری ہے اور امسال یاترا کے ابتدائی دنوں میں ہی عقیدت مندوں کی حاضری گزشتہ برسوں کے مقابلے میں حوصلہ افزا رہی ہے۔
سالانہ امرناتھ یاترا کا آغاز۳ جولائی کو روایتی۴۸ کلومیٹر طویل ننون-پہلگام راستے اور۱۴ کلومیٹر طویل بالتل راستے سے بیک وقت ہوا تھا، جبکہ یاترا۲۸؍ اگست کو اختتام پذیر ہوگی۔
ادھر منگل کی صبح بھگوتی نگر یاترا نواس، جموں سے اب تک کا سب سے بڑا قافلہ سخت سیکورٹی انتظامات کے درمیان کشمیر روانہ ہوا۔ حکام کے مطابق۸۸۱۵ یاتریوں پر مشتمل اس قافلے میں۵۸۳۱ مرد‘۲۱۹۳ خواتین‘۳۱ بچے‘۵۹۸سادھو‘۱۳۱ سادھویاں اور۳۱غیر ملکی عقیدت مند شامل تھے۔
انتظامیہ کے مطابق یاترا کے تمام راستوں پر سیکورٹی، طبی سہولیات، ٹریفک نظم و نسق، رہائش، صفائی اور دیگر بنیادی انتظامات کو مزید مستحکم بنایا گیا ہے تاکہ عقیدت مندوں کو محفوظ اور سہل سفر کی سہولت فراہم کی جا سکے۔
