لندن، 3 جولائی (یو این آئی) جنوبی افریقہ کے ہیڈ کوچ منڈلا ماشمبی نے کہا ہے کہ آئی سی سی ویمنز ٹی20 ورلڈ کپ کے سیمی فائنل میں انگلینڈ سے شکست کے باوجود ان کی ٹیم اس تجربے سے سبق سیکھ کر مستقبل میں مزید مضبوط بن کر واپس آئے گی۔
انہوں نے کہا، "ہار سے سیکھنا پڑتا ہے۔ اس ورلڈ کپ میں ہمیں بہت کچھ سیکھنے کا موقع ملا اور اب ہم اپنی خامیوں کو دور کرکے خود کو پہلے سے زیادہ خطرناک اور مضبوط ٹیم بنائیں گے۔”
ماشـمبی نے کہا کہ ٹیم اپنی کمزوریوں سے واقف ہے اور آئندہ ورلڈ کپ یا آئی سی سی ٹورنامنٹس میں بہتر تیاری کے ساتھ میدان میں اترے گی۔
ٹورنامنٹ میں تازمین برٹس نے 225 رنز بنائے، جبکہ ماریزانے کیپ اور شبنم اسماعیل نے آٹھ، آٹھ وکٹیں حاصل کیں۔ کوچ نے امید ظاہر کی کہ 37 سالہ شبنم اسماعیل مستقبل میں بھی قومی ٹیم کے لیے کھیلتی رہیں گی۔
انہوں نے اعتراف کیا کہ ٹیم کے بولنگ اٹیک میں تنوع کی کمی تھی اور فرنٹ لائن اسپنر نونکولولیکو ملابا کو مطلوبہ تعاون نہیں مل سکا، جس پر مستقبل میں کام کیا جائے گا۔
