ایجنسیاں
سری نگر؍ یکم جولائی
کشمیر کے کسی بھی سیاحتی مقام پر پہلی بار گلمرگ ڈیولپمنٹ اتھارٹی (جی ڈی اے) نے ٹریفک کے دباؤ کو کم کرنے اور ماحولیات کے تحفظ کے لیے آزمائشی بنیادوں پر طاق،جفت (اوڈ۔ایون) گاڑیوں کے داخلے کا نظام نافذ کرنے کا فیصلہ کیا ہے۔
جی ڈی اے کی جانب سے جاری حکم نامے کے مطابق نئی ٹریفک پالیسی۵ جولائی سے نافذ ہوگی اور۵؍ اگست تک ایک ماہ کے پائلٹ منصوبے کے طور پر جاری رہے گی۔
اس منصوبے کے تحت نجی اور تجارتی چار پہیہ گاڑیاں، جن کے رجسٹریشن نمبر کا آخری ہندسہ طاق(۱‘۳‘۵‘۷؍اور۹)ہوگا، صرف طاق تاریخوں میں گلمرگ میں داخل ہو سکیں گی، جبکہ جفت(۰،۲،۴،۶،۸) ہندسے پر ختم ہونے والی گاڑیوں کو صرف جفت تاریخوں میں داخلے کی اجازت ہوگی۔
یہ پابندیاں روزانہ صبح۸ بجے سے رات۸بجے تک نافذ رہیں گی۔البتہ، عوامی نقل و حمل اور مال بردار گاڑیوں کو اس طاق۔جفت نظام سے مستثنیٰ رکھا گیا ہے۔
گلمرگ ڈیولپمنٹ اتھارٹی کے چیف ایگزیکٹو آفیسر طارق حسین نے کہا کہ اس اقدام کا مقصد یہ جانچنا ہے کہ آیا یہ نظام ٹریفک کے بہتر انتظام اور اس معروف سیاحتی مقام پر ماحولیاتی دباؤ کو کم کرنے میں مؤثر ثابت ہوتا ہے یا نہیں۔
حسین نے، این ڈی ٹی وی کے مطابق، کہا’’یہ پائلٹ منصوبہ ایک ماہ تک نافذ رہے گا، جس دوران پولیس، ٹریفک انتظامیہ اور دیگر متعلقہ محکموں کے اشتراک سے ٹریفک کے انتظام، ماحولیات کے معیار اور سیاحوں کی سہولت پر اس کے اثرات کا جائزہ لیا جائے گا‘‘۔
جی ڈی اے نے کہا ہے کہ پائلٹ منصوبے کے نتائج اور متعلقہ محکموں کی سفارشات کی بنیاد پر اس نظام کا ازسرِنو جائزہ لیا جا سکتا ہے اور ضرورت پڑنے پر اس میں ترمیم، توسیع یا اسے واپس بھی لیا جا سکتا ہے۔
گلمرگ، جو کشمیر کے مقبول ترین سیاحتی مقامات میں شمار ہوتا ہے، میں سیاحتی سیزن کے دوران گاڑیوں کی آمدورفت میں غیر معمولی اضافہ دیکھنے میں آتا ہے۔ حکام کے مطابق اس بڑھتے ہوئے ٹریفک کے باعث فضائی آلودگی، شور کی آلودگی اور علاقے کے نازک پہاڑی ماحولیاتی نظام پر دباؤ میں مسلسل اضافہ ہو رہا ہے۔
اتھارٹی کا کہنا ہے کہ طاق،جفت نظام متعارف کرانے کا مقصد ٹریفک کی روانی بہتر بنانا، سیاحوں کے تجربے کو خوشگوار بنانا اور اس بلند مقام کے قدرتی ماحول اور ماحولیاتی توازن کا تحفظ یقینی بنانا ہے۔
۔۔۔۔۔۔۔
