ایجنسیاں
سرینگر؍ یکم جولائی
جموں و کشمیر پولیس کے کاؤنٹر انٹیلی جنس کشمیر (سی آئی کے) ونگ نے بدھ کے روز۲۰۲۰ میں درج ایک ایف آئی آر کے سلسلے میں کشمیر چیمبر آف کامرس اینڈ انڈسٹری (کے سی سی آئی) کے سابق صدر مبین احمد شاہ کی غیر منقولہ جائیداد ضبط کر لی۔
حکام کے مطابق سی آئی کے کی ایک ٹیم نے سری نگر کے دالگیٹ کے بچھوارہ علاقے میں واقع مبین احمد شاہ کی رہائش گاہ پر چھاپہ مارا، جہاں متعلقہ محکمۂ مال کے افسر کی موجودگی میں جائیداد ضبط کرنے کی کارروائی انجام دی گئی۔
ضبط کی گئی جائیداد میں بچھوارہ اسٹیٹ میں واقع۱۲ مرلہ اراضی شامل ہے۔
حکام نے بتایا کہ کے سی سی آئی کے سابق صدر مبین احمد شاہ دسمبر۲۰۱۹ سے اپنے اہلِ خانہ کے ساتھ ملائیشیا میں مقیم ہیں۔انہوں نے کہا کہ یہ کارروائی پولیس اسٹیشن کاؤنٹر انٹیلی جنس کشمیر میں درج ایک ایف آئی آرکی تحقیقات کے سلسلے میں عمل میں لائی گئی ہے۔تاہم حکام نے مقدمے کی مزید تفصیلات فوری طور پر ظاہر نہیں کیں۔ (ایجنسیاں)
