گڈکری نے جھارکھنڈ-اتراکھنڈ میں جاری پروجیکٹوں کا جائزہ لیا، معیار پر زور

نئی دہلی، 29 جون (یو این آئی) سڑک ٹرانسپورٹ اور شاہراہوں کےمرکزی وزیر نتن گڈکری نے پیر کو جھارکھنڈ اور اتراکھنڈ میں نیشنل ہائی وے (قومی شاہراہ) پروجیکٹوں کے معیار، دیکھ بھال اور پیش رفت کا جائزہ لیتے ہوئے مقررہ وقت پر کام کی تکمیل اور اعلیٰ معیارات پر عمل آوری کو یقینی بنانے کی ہدایات دیں۔
مسٹر گڈکری نے آج یہاں منعقدہ الگ الگ جائزہ میٹنگوں میں جھارکھنڈ کے 3,245 کلومیٹر اور اتراکھنڈ کے 4,026 کلومیٹر کے نیشنل ہائی وے پروجیکٹوں کی پیش رفت کا جائزہ لیتے ہوئے کہا کہ سڑکوں کی تعمیر میں معیار کو خاص طور پر یقینی بنانا ضروری ہے۔ انہوں نے جدید تعمیری تکنیکوں کے زیادہ استعمال، معیار کی نگرانی کو مضبوط کرنے اور سڑکوں کی بہتر رائیڈنگ کوالٹی کو یقینی بنانے پر زور دیتے ہوئے کہا کہ آنے والے مانسون کے پیشِ نظر مؤثر نکاسیٔ آب، ڈھلانوں کے تحفظ، احتیاطی دیکھ بھال اور فوری ردِ عمل کے نظام کو مضبوط کرنے کی بھی ہدایات دیں۔ ان کا کہنا تھا کہ وقت پر مربوط کارروائی سے ٹریفک کی روانی میں رکاوٹ کو روکا جا سکے گا، مسافروں کی حفاظت یقینی ہوگی اور نیشنل ہائی ویز کی طویل مدتی پائیداری بڑھے گی۔