ایجنسیاں
سری نگر؍۲۷ جون
شمالی کشمیر کے ضلع بارہمولہ کے گلمرگ سیکٹر میں آشا پوسٹ کے قریب سملووالی ڈھوک کے نزدیک ہفتہ کی دوپہر ایک پرانا ناکارہ گولہ اچانک پھٹ جانے سے ایک شہری موقع پر ہی جاں بحق جبکہ متعدد دیگر زخمی ہو گئے۔
سرکاری ذرائع نے کشمیر ڈاٹ کام کو بتایا کہ جاں بحق ہونے والے شخص کی شناخت ضلع بارہمولہ کے چندوسہ علاقے کے رہائشی زبیر احمد بجاڑ کے طور پر ہوئی ہے۔
ابتدائی اطلاعات کے مطابق یہ گولہ ماضی میں استعمال ہونے والا لیکن نہ پھٹنے والا گولہ تھا، جو علاقے میں شہریوں کے ایک گروپ کی موجودگی کے دوران اچانک پھٹ گیا۔
حادثے میں زخمی ہونے والے افراد کو فوری طور پر علاج کے لیے قریبی اسپتال منتقل کیا گیا، تاہم فوری طور پر ان کی حالت کے بارے میں کوئی تفصیل سامنے نہیں آئی۔
واقعے کی اطلاع ملتے ہی پولیس اور دیگر سکیورٹی اہلکار جائے وقوع پر پہنچ گئے۔
دریں اثنا، دھماکے کے اصل اسباب اور اس سے متعلق تمام حالات کا پتہ لگانے کے لیے تحقیقات شروع کر دی گئی ہے۔
اس دوران بارہمولہ پولیس نے ہفتہ کے روز گلمرگ کے آشا پوسٹ علاقے میں فوجی اہلکاروں کے زخمی ہونے سے متعلق گردش کرنے والی افواہوں کی سختی سے تردید کرتے ہوئے انہیں مکمل طور پر جھوٹا، بے بنیاد اور حقائق کے منافی قرار دیا ہے۔
بارہمولہ پولیس کی جانب سے جاری بیان میں کہا گیا ہے کہ پولیس کے علم میں یہ بات آئی ہے کہ بعض عناصر کی جانب سے یہ غیر مصدقہ اور جھوٹی معلومات پھیلائی جا رہی ہیں کہ آشا پوسٹ پر فوجی اہلکار زخمی ہوئے ہیں۔
بیان میں واضح کیا گیا کہ یہ اطلاع مکمل طور پر غلط، بے بنیاد اور حقائق سے عاری ہے۔ آشا پوسٹ پر کسی بھی فوجی اہلکار کے زخمی ہونے کا کوئی واقعہ پیش نہیں آیا ہے۔
پولیس نے کہا کہ غیر درست اور غیر مصدقہ معلومات کی تشہیر سے عوام میں غیر ضروری تشویش اور الجھن پیدا ہو سکتی ہے، جس کے ساتھ امن و امان کی صورتحال بھی متاثر ہونے کا خدشہ رہتا ہے۔ عوام سے اپیل کی گئی ہے کہ وہ صرف سرکاری ذرائع سے جاری ہونے والی مصدقہ معلومات پر ہی اعتماد کریں۔
پولیس کے ترجمان نے کہا کہ بارہمولہ پولیس نے اس معاملے کا نوٹس لے لیا ہے اور جو بھی شخص عوام کو گمراہ کرنے یا امن و امان میں خلل ڈالنے کی نیت سے جھوٹی معلومات تیار کرنے یا پھیلانے میں ملوث پایا گیا، اس کے خلاف قانون کی متعلقہ دفعات کے تحت سخت کارروائی کی جائے گی۔
ترجمان نے مزید کہا کہ بارہمولہ پولیس عوامی امن و امان کے قیام، شفافیت کو برقرار رکھنے اور بروقت و درست معلومات کی فراہمی کے لیے پوری طرح پرعزم ہے۔
