کاراکاس 26 جون (یو این آئی) وینزوئلا میں آئے تباہ کن زلزلے سے مرنے والوں کی تعداد بڑھ کر 235 ہو گئی ہے وزیر صحت کارلوس الوارڈو نے یہ معلومات فراہم کیں الوارڈو نے سرکاری ٹیلی
ویژن چینل وی ٹی وی پر بتایا کہ "آج شام سات بجے تک، ہم نے چار ہزارتین سو سے زیادہ زخمی لوگوں کو مدد فراہم کی ہے ان میں سے زیادہ تر کو معمولی چوٹیں آئی ہیں، لیکن کچھ مریض درمیانی سے شدید حالت میں بھی ہیں، جن میں سے کئی کو سرجری کی ضرورت پڑی۔”
انہوں نے کہا کہ تقریباً 235 افراد کو اسپتالوں میں لایا گیا جو "پہلے ہی دم توڑ چکے تھے یا طبی اداروں میں پہنچنے کے فوراً بعد فوت ہو گئے۔”
وزیر موصوف نے کہا کہ سب سے نازک صورتحال لاگوائرا ریاست میں برقرار ہے، جہاں سب سے زیادہ ہلاکتیں اور زخمی ریکارڈ کیے گئے ہیں۔
الوارڈو نے بتایا کہ زلزلے کے فوراً بعد پورے ملک میں ریاستی ہنگامی حالات کا اعلان کردیا گیا تھا اور سب سے زیادہ متاثرہ علاقوں میں مدد فراہم کرنے کے لیے 1,200 سے زائد ڈاکٹروں سمیت پانچ ہزار سے زیادہ طبی عملے کو تعینات کیا گیا ہے۔
انہوں نے کہا کہ اس مہم میں نہ صرف سرکاری بلکہ نجی کلینک بھی شامل ہوئے ہیں۔ پرائیوٹ طبی اداروں میں 150 سے زائد مریضوں کا علاج کیا جا رہا ہے، اور معمولی چوٹوں والے کئی زخمیوں کو پہلے ہی چھٹی دی جا چکی ہے۔
بدھ کو وینزوئلا میں 7.2 اور 7.5 شدت کے دو طاقتور زلزلے آئے۔ ان کے بعد 30 آفٹر شاکس محسوس کیے گئے۔ کئی گھر تباہ ہو گئے، بنیادی ڈھانچے اور اسپتالوں کو نقصان پہنچا، اور ملک کا اہم ہوائی اڈا بند کر دیا گیا۔
