ڈبلن، 25 جون ( یو این آئی) ہندوستان اور آئرلینڈ کے درمیان ہونے والی ٹی20 سیریز کے دو میچز کے اوقات میں تبدیلی کر دی گئی ہے تاکہ خواتین ٹی20 ورلڈ کپ کے میچ سے ممکنہ ٹکراؤ کم کیا جا سکے۔
کرکٹ آئرلینڈ نے تصدیق کی ہے کہ دونوں ٹی20 میچ اب مقامی وقت کے مطابق دوپہر 1:30 بجے شروع ہوں گے، جو ہندوستانی وقت کے مطابق شام 6 بجے بنتا ہے۔ عام طور پر ہندوستان کے ٹی20 انٹرنیشنل میچ شام 7 بجے شروع ہوتے ہیں۔
یہ تبدیلی خاص طور پر 28 جون (اتوار) کو ہونے والے اہم مقابلے کے باعث کی گئی ہے، جب ہندوستان کی خواتین ٹیم ورلڈ کپ میچ میں آسٹریلیا کے خلاف لارڈز میں شام 7 بجے میدان میں اترے گی۔رپورٹ کے مطابق نشریاتی ادارے اور کرکٹ آئرلینڈ نے مشاورت کے بعد یہ فیصلہ کیا تاکہ دونوں میچز کے درمیان اوورلیپ کم سے کم ہو سکے۔ اس میں ہندوستانی براڈکاسٹر سونی اسپورٹس کی مشاورت بھی شامل تھی۔اگرچہ مکمل ٹکراؤ ختم نہیں ہوگا، لیکن نئے وقت سے براہِ راست مقابلے کی صورتحال کافی حد تک کم ہو جائے گی۔
