نو یوگ ٹنل پر مخصوص اوقات کے بعد سرینگر سے جانے اور جموں سے آنے والی گاڑیوں کے داخلے پر پابندی
(ندائے مشرق خبر)
سرینگر؍۲۲ جون
جموں و کشمیر پولیس نے شری امرناتھ جی یاترا کے پیش نظر ایک جامع ٹریفک ایڈوائزری جاری کرتے ہوئے اعلان کیا ہے کہ سالانہ یاترا کے دوران جموں،سری نگر قومی شاہراہ پر عام ٹریفک کی نقل و حرکت پر روزانہ کی بنیاد پر پابندیاں نافذ رہیں گی۔
ایڈوائزری کے مطابق شری امرناتھ یاترا؍۳ جولائی سے شروع ہو کر۲۸؍ اگست تک جاری رہے گی۔
پولیس کے مطابق۳ جولائی سے کشمیر سے جموں کی طرف جانے والی عام گاڑیوں کو روزانہ صبح۱۱:۳۰ بجے کے بعد نو یوگ ٹنل عبور کرنے کی اجازت نہیں ہوگی۔
اسی طرح جموں سے کشمیر کی جانب سفر کرنے والی گاڑیوں کو روزانہ سہ پہر۳ بجے کے بعد نو یوگ ٹنل پار کرنے کی اجازت نہیں دی جائے گی۔
ایڈوائزری میں کشمیر اور جموں کی جانب جانے والی گاڑیوں کے لیے قومی شاہراہ کے مختلف مقامات پر الگ الگ کٹ آف اوقات بھی مقرر کیے گئے ہیں۔
کشمیر جانے والی گاڑیوں کے لیے میر بازار، قاضی گنڈ، لوئر منڈا اور دیگر مخصوص مقامات پر کٹ آف پوائنٹس قائم کیے گئے ہیں، جبکہ جموں کی جانب جانے والی گاڑیوں کے لیے بھی شاہراہ کے مختلف مقامات پر علیحدہ اوقات مقرر کیے گئے ہیں۔
پولیس نے سیاحوں، یاتریوں اور عام مسافروں کو مشورہ دیا ہے کہ وہ اپنے سفر کی منصوبہ بندی پیشگی کریں اور وقتاً فوقتاً جاری ہونے والی سرکاری ٹریفک ایڈوائزری سے باخبر رہیں۔
ایڈوائزری میں مزید کہا گیا ہے کہ مسافر صبح سویرے اپنے سفر کا آغاز کریں، ٹریفک پولیس کی ہدایات پر عمل کریں اور قومی شاہراہ پر غیر ضروری قیام سے گریز کریں۔
حکام کے مطابق یہ اقدامات یاترا کے قافلوں کی بلا رکاوٹ نقل و حرکت کو یقینی بنانے اور زائرین کی حفاظت و سلامتی برقرار رکھنے کے لیے کیے گئے ہیں۔
پولیس نے عوام سے اپیل کی ہے کہ وہ مقررہ اوقات کی سختی سے پابندی کریں تاکہ کسی بھی قسم کی پریشانی یا سفری خلل سے بچا جا سکے۔
