(ایجنسیاں)
سرینگر؍۲۰جون
جموں و کشمیر کے لیفٹیننٹ گورنر‘ منوج سنہا نے ہفتہ کے روز گاندربل ضلع کے مشہور سیاحتی مقام ناراناگ کو تقریباً ۱۴ماہ بعد دوبارہ کھولنے کا حکم جاری کر دیا۔
یہ مقام گزشتہ سال پہلگام میں ہونے والے دہشت گردانہ حملے کے بعد بند کر دیا گیا تھا۔
وسطی کشمیر کے ضلع گاندربل میں واقع یہ معروف سیاحتی مقام تاریخی ناراناگ مندر کا بھی مسکن ہے، جو آٹھویں صدی میں تعمیر کیا گیا تھا اور بھگوان شیو کے نام سے منسوب ہے۔
لیفٹیننٹ گورنر منوج سنہا نے سوشل میڈیا پلیٹ فارم ایکس پر ایک پوسٹ میں کہا’’جامع سکیورٹی جائزے کے بعد گاندربل میں واقع ناراناگ مندر کو عقیدت مندوں اور سیاحوں کے لیے دوبارہ کھولنے کا فیصلہ کیا گیا ہے‘‘۔
واضح رہے کہ گزشتہ سال اپریل میں جنوبی کشمیر کے ضلع اننت ناگ کے پہلگام علاقے کے بیسرن میدانوں میں ہونے والے مہلک دہشت گردانہ حملے میں۲۶؍ افراد، جن میں زیادہ تر سیاح شامل تھے، ہلاک ہوگئے تھے۔اس حملے کے بعد احتیاطی تدابیر کے طور پر متعدد سیاحتی مقامات کو بند کر دیا گیا تھا۔تاہم گزشتہ چند ماہ کے دوران لیفٹیننٹ گورنر نے مرحلہ وار کئی سیاحتی مقامات کو دوبارہ کھولنے کے احکامات جاری کیے ہیں۔
