ٹریڈ لائسنس-پراپرٹی ٹیکس لنکنگ کے باوجود میونسپل کارپوریشن کا پورٹل اپڈیٹ نہیں: یادو

نئی دہلی، 17 جون (یو این آئی) دہلی پردیش کانگریس صدر دیویندر یادو نے بدھ کو کہا کہ ٹریڈ لائسنس اور پراپرٹی ٹیکس (املاک ٹیکس) کو لنک کرنے کے بعد بھی میونسپل کارپوریشن کا پورٹل اپڈیٹ نہیں ہو سکا ہے اور یہ بھارتیہ جنتا پارٹی (بی جے پی) کے زیر اقتدار دہلی حکومت اور میونسپل کارپوریشن کی بڑی ناکامی ہے۔
مسٹر یادو نے یہاں جاری بیان میں کہا کہ اپریل میں جاری حکم کے ڈھائی مہینے بعد بھی پورٹل اپڈیٹ نہ ہونے سے لاکھوں تجارتی اداروں کے ٹریڈ لائسنس کی تجدید (رینیوول) رکی ہوئی ہے۔ ہوٹل، ریسٹورنٹ، جم، کیفے، ڈیری، ہسپتال، میڈیکل اسٹور، گودام اور دیگر تجارتی ادارے لائسنس کی تجدید کے لیے انتظار کر رہے ہیں۔ اس تاخیر کی وجہ سے تاجروں پر روزانہ 500 روپے تک جرمانے اور دکانوں کی سیلنگ کا خطرہ منڈلا رہا ہے۔ انہوں نے الزام لگایا کہ بی جے پی حکومت کے دورِ اقتدار میں تاجر پہلے ہی سیلنگ، سروے اور کاروبار میں مندی کی مار جھیل رہے ہیں۔
کانگریس صدر نے کہا کہ پراپرٹی ٹیکس اور ٹریڈ لائسنس کو جوڑنے کا نیا نظام کرایہ دار دکان داروں کے لیے بھی پریشانی کا باعث بن سکتا ہے۔ اگر عمارت کا مالک پراپرٹی ٹیکس جمع نہیں کرے گا تو کرایہ دار کا لائسنس بھی متاثر ہوگا۔ انہوں نے انتباہ دیا کہ اگر 30 جون تک پورٹل اپڈیٹ نہیں ہوا تو پراپرٹی ٹیکس پر ملنے والی 10 فیصد کی چھوٹ بھی ختم ہو جائے گی، جس سے تاجروں اور عام شہریوں کو مالی نقصان اٹھانا پڑے گا۔
مسٹر یادو نے وزیر اعلیٰ ریکھا گپتا اور دہلی کی میئر سے فوری طور پر پورٹل اپڈیٹ کرانے، لائسنس کی تجدید میں تاخیر پر جرمانہ معاف کرنے نیز تاجروں کو سیلنگ اور تعزیری کارروائی سے راحت دینے کا مطالبہ کیا۔