’حکومت کی تبدیلی سے لے کر جوہری پروگرام، میزائل صلاحیت اور خطے میں ایرانی اثر و رسوخ کے خاتمے تک کوئی ہدف پورا نہ ہو سکا‘
(ویب ڈیسک)
سرینگر؍۱۶جون
امریکی صدر ڈونلڈ ٹرمپ نے۲۸ فروری کو ایران کے خلاف کارروائی کا آغاز کرتے ہوئے کئی بڑے اہداف کا اعلان کیا تھا۔ ان میں ایرانی حکومت کا خاتمہ، جوہری پروگرام کا مکمل خاتمہ، میزائل صنعت کی تباہی، بحریہ کو ناکارہ بنانا اور خطے میں مسلح گروہوں کی حمایت روکنا شامل تھا۔
تاہم جنگ بندی کے بعد سامنے آنے والی اطلاعات اور امریکہ و ایران کے درمیان طے پانے والی مفاہمتی یادداشت سے ظاہر ہوتا ہے کہ ٹرمپ کے بیشتر بنیادی مقاصد یا تو حاصل نہیں ہو سکے، یا انہیں مستقبل کے مذاکرات کے لیے مؤخر کر دیا گیا ہے۔
جنگ کے دوران خود ٹرمپ کے اہداف بھی بدلتے رہے۔ مثال کے طور پر آبنائے ہرمز کی بحالی کو بعد میں ایک بڑی کامیابی کے طور پر پیش کیا گیا، حالانکہ جنگ سے قبل یہ آبی گزرگاہ کھلی ہوئی تھی اور اس کی بندش خود جنگ کا نتیجہ تھی۔ اسی طرح ایران کے انتہائی افزودہ یورینیم کے ذخیرے کے خاتمے کی بات کی گئی، جبکہ ایسے ذخائر۲۰۱۸ میں ٹرمپ کی جانب سے۲۰۱۵ کے جوہری معاہدے سے دستبرداری کے بعد وجود میں آئے تھے۔
جنگ کے آغاز پر ٹرمپ نے ایرانی عوام سے کھلے عام اپنی حکومت کے خلاف اٹھ کھڑے ہونے کی اپیل کی تھی۔ تاہم جنگ بندی کے معاہدے میں ایران کے اندر سیاسی تبدیلی یا حکومت کی تبدیلی سے متعلق کوئی شق شامل نہیں ہے۔
ایران کا مذہبی و سیاسی نظام بدستور قائم ہے اور جنگ بندی کے فریم ورک میں اقتدار کی منتقلی کا کوئی طریقہ کار موجود نہیں۔ شدید فوجی نقصانات کے باوجود ایران نے پورے تنازع کے دوران جوابی حملے جاری رکھے، جس سے ظاہر ہوتا ہے کہ حکومت سیاسی طور پر کمزور نہیں ہوئی۔
ایران کے جوہری پروگرام کا خاتمہ ٹرمپ کے سب سے زیادہ دہرائے جانے والے اہداف میں شامل تھا، لیکن یہ معاملہ اب بھی حل طلب ہے۔
اطلاعات کے مطابق مفاہمتی یادداشت میں ایران کی جوہری سرگرمیوں سے متعلق حتمی فیصلے کو مستقبل کے مذاکرات پر چھوڑ دیا گیا ہے۔ ایران مسلسل یہ مؤقف اختیار کرتا رہا ہے کہ اس کا جوہری پروگرام پرامن اور سول مقاصد کے لیے ہے اور وہ جوہری ہتھیار بنانے کا ارادہ نہیں رکھتا۔
ٹرمپ نے ایران کی میزائل صنعت کو’زمین بوس‘ کرنے اور بیلسٹک میزائل صلاحیت ختم کرنے کا اعلان کیا تھا۔تاہم فرانسیسی خبر رساں ادارے اے ایف پی کے مطابق ایرانی ذرائع کا کہنا ہے کہ میزائل پروگرام کا معاملہ مکمل طور پر مذاکراتی ایجنڈے سے نکال دیا گیا ہے۔ اس طرح جنگ کے ایک اہم مقصد پر کوئی پیش رفت نظر نہیں آتی۔
امریکہ اور اسرائیل کے اہم اہداف میں لبنان کی حزب اللہ سمیت ایران کے اتحادی مسلح گروہوں کی حمایت روکنا بھی شامل تھا۔لیکن اس معاملے میں بھی کوئی نمایاں کامیابی سامنے نہیں آئی۔ اے ایف پی کے مطابق ایران نے جن گروہوں کو ’محورِ مزاحمت‘ قرار دیا ہے، ان کی حمایت کا موضوع بھی مذاکراتی ایجنڈے سے خارج کر دیا گیا ہے۔ یوں خطے میں ایران کے اثر و رسوخ کو محدود کرنے کا مقصد بھی مؤخر ہوتا دکھائی دیتا ہے۔
جنگ کا سب سے نمایاں معاشی اثر آبنائے ہرمز میں بحری آمدورفت کی معطلی کی صورت میں سامنے آیا، جہاں سے دنیا کی تقریباً۲۰ فیصد تیل سپلائی گزرتی ہے۔
اس بندش کے باعث جہاز رانی شدید متاثر ہوئی اور تیل، گیس اور دیگر اشیائے صرف کی قیمتوں میں نمایاں اضافہ ہوا۔ امریکی حکام ایران کی جانب سے آبی گزرگاہ دوبارہ کھولنے پر آمادگی کو ایک بڑی کامیابی قرار دے رہے ہیں۔
تاہم ایرانی حکام کا کہنا ہے کہ آبنائے ہرمز پہلے جیسی صورتحال میں واپس نہیں آئے گی اور ایران مستقبل میں اس اہم بحری راستے کی نگرانی اور ضابطہ کاری میں زیادہ فعال کردار ادا کرے گا۔
جنگ کے دوران امریکی اور اسرائیلی افواج نے ایران کے سینکڑوں فوجی اہداف کو نشانہ بنایا۔ ان میں بیلسٹک میزائل تنصیبات، کمانڈ اینڈ کنٹرول مراکز، لانچر، فضائی دفاعی نظام، ڈرون اثاثے اور بحری جہاز شامل تھے۔
اس کے باوجود ایران نے پورے تنازع کے دوران اسرائیل، متحدہ عرب امارات، کویت، بحرین، قطر، سعودی عرب اور عمان کی سمت میزائل اور ڈرون حملے جاری رکھے، جس سے ظاہر ہوتا ہے کہ اس کی عسکری صلاحیت مکمل طور پر ختم نہیں ہو سکی۔
جنگ کے معاشی اثرات دنیا بھر میں محسوس کیے گئے۔ آبنائے ہرمز سے گزرنے والی توانائی سپلائی پر انحصار کرنے والے ممالک، خصوصاً بھارت، شدید دباؤ کا شکار ہوئے۔
فروری سے مئی کے درمیان بھارت میں معدنی تیل کی قیمتوں میں۴۶ء۵ فیصد جبکہ خام تیل اور قدرتی گیس کی قیمتوں میں۴۸ء۱فیصد اضافہ ریکارڈ کیا گیا۔
عالمی مالیاتی منڈیوں میں بھی غیر یقینی صورتحال نمایاں رہی۔ جاپان کا نکیئی۲۲۵؍ انڈیکس۱۷ء۸ فیصد اور جنوبی کوریا کا کوسپی۳۶ء۹ فیصد بڑھا، جبکہ جرمنی کا ڈی اے ایکس۱ء۳ فیصد، چین کا ایس ایس ای کمپوزٹ۱ء۶فیصد، برطانیہ کا ایف ٹی ایس ای۱۰۰؍انڈیکس۳ء۹فیصد اور بھارت کا سینسیکس۶ء۲ فیصد گر گیا۔
اگرچہ جنگ بندی نے براہِ راست لڑائی کو روک دیا ہے، لیکن ٹرمپ کی جانب سے جنگ کے آغاز پر بیان کیے گئے بیشتر مقاصد ابھی تک حاصل نہیں ہو سکے۔ ایران میں حکومت کی تبدیلی واقع نہیں ہوئی، جوہری پروگرام کا مستقبل غیر واضح ہے، میزائل پروگرام پر کوئی پابندی عائد نہیں ہوئی اور خطے میں ایران کے اتحادی گروہوں کی حمایت بھی مذاکرات کا حصہ نہیں رہی۔
یوں جنگ کے خاتمے کے باوجود یہ سوال بدستور موجود ہے کہ آیا امریکہ اپنے اسٹریٹجک مقاصد حاصل کرنے میں کامیاب ہوا یا نہیں۔
