ہر نوجوان میں ہے صلاحیت، ضرورت صحیح موقع فراہم کرنے کی: ریکھا گپتا

نئی دہلی، 20 مئی (یو این آئی) دہلی کی وزیر اعلیٰ ریکھا گپتا نے بدھ کو کہا کہ ان کی حکومت کا ماننا ہے کہ ہر نوجوان میں صلاحیت ہوتی ہے اور ضرورت صرف اسے صحیح موقع اور پلیٹ فارم دینے کی ہے۔
محترمہ گپتا نے آج یہاں ‘ٹیلنٹ ہنٹ اسکیم – حوصلوں کی اڑان 2026-27’ کا اعلان کرتے ہوئے کہا کہ یہ پہل صرف ایک مقابلہ نہیں، بلکہ دہلی کے نوجوانوں کی صلاحیتوں کو پہچاننے، نکھارنے اور قومی سطح تک پہنچانے کا ایک مضبوط پلیٹ فارم بنے گی۔ انہوں نے اس پرجوش اسکیم کے آفیشل لوگو کی بھی نقاب کشائی کی۔ انہوں نے کہا کہ یہ لوگو دہلی کے نوجوانوں کے خوابوں، تخلیقی صلاحیتوں اور اڑان بھرتے ہوئے اعتماد کی علامت ہے۔ انہوں نے کہا کہ دہلی حکومت کا ماننا ہے کہ ہر نوجوان میں صلاحیت ہوتی ہے اور ضرورت صرف اسے صحیح موقع اور پلیٹ فارم فراہم کرنے کی ہے۔ اسی سوچ کے ساتھ محکمہ آرٹ، کلچر اینڈ لینگویج (فن، ثقافت اور زبان) کے ذریعے اس اسکیم پر عمل درآمد کیا جائے گا۔ یہ اسکیم دہلی کے نوجوانوں کو اپنا فن دکھانے، اعتماد بڑھانے اور پہچان بنانے کا موقع فراہم کرے گی۔ ساتھ ہی، یہ دہلی کی مالامال ثقافتی وراثت اور جدید تخلیقی صلاحیتوں کو بھی فروغ دے گی۔
وزیر اعلیٰ نے بتایا کہ اس اسکیم کا مقصد صرف صلاحیتوں کی تلاش کرنا نہیں، بلکہ دہلی کے نوجوانوں کے لیے ایک ایسا پلیٹ فارم تیار کرنا ہے جو رسائی، شمولیت، تنوع اور باصلاحیت نوجوانوں کے لیے خود روزگارِ اور خود انحصاری کے مواقع کو فروغ دے۔ انہوں نے کہا کہ یہ پہل مختلف سماجی اور معاشی پس منظر سے آنے والے نوجوانوں کو مساوی مواقع فراہم کرتے ہوئے ان کی تخلیقی صلاحیتوں کو نئی سمت دے گی۔ انہوں نے کہا کہ یہ اسکیم دہلی کے تمام 70 اسمبلی حلقوں میں نافذ کی جائے گی۔ اسکیم کے لیے 10 کروڑ روپے کا بجٹ مختص کیا گیا ہے۔ اس کے تحت تقریباً 25,000 سے زیادہ نوجوانوں کو مختلف مراحل میں حصہ لینے کا موقع ملے گا۔ پورے عمل کو شفاف، منظم اور مرحلہ وار طریقے سے منعقد کیا جائے گا تاکہ ہر شریک کو مساوی موقع مل سکے۔ 16 سے 35 سال کے نوجوان اس اسکیم کے تحت منگل سے ڈبلیو ڈبلیو ڈبلیو ڈاٹ دہلی ٹیلنٹ ہب ڈاٹ کام کے مخصوص آن لائن پورٹل کے ذریعے بالکل مفت رجسٹریشن کر سکیں گے۔ اسی پورٹل پر رجسٹریشن، پروگرام کی معلومات اور اپڈیٹس بھی باقاعدگی سے ملیں گے۔
وزیر اعلیٰ نے بتایا کہ یہ پروگرام چار مراحل میں منعقد کیا جائے گا۔ پہلے مرحلے میں آن لائن رجسٹریشن اور ساتوں زمروں (کیٹیگریز) میں موصول ہونے والی درخواستوں کی اسکریننگ اور شارٹ لسٹنگ کی جائے گی۔ دہلی کے تمام 70 اسمبلی حلقوں سے تقریباً 24,500 شرکاء کا انتخاب اگلے مرحلے کے لیے کیا جائے گا۔ دوسرے مرحلے میں 35 کلسٹر سطح کے مقابلے منعقد ہوں گے، جس میں ہر کلسٹر میں دو اسمبلی حلقوں کو شامل کیا جائے گا۔ اس مرحلے میں مختلف زمروں سے کل 2,450 شرکاء کا انتخاب کیا جائے گا۔ تیسرے مرحلے میں منتخب شرکاء کے لیے چار زونل سطح کے مقابلے منعقد کیے جائیں گے، جہاں ہر زمرے کے بہترین شرکاء کا انتخاب کیا جائے گا۔ اس کے بعد آخری مرحلے میں 28 فائنلسٹ شرکاء کے درمیان اگست میں ریاستی سطح کا گرینڈ فینالے منعقد ہوگا، جس میں ساتوں زمروں میں جیتنے والوں کو انعامی رقم فراہم کی جائے گی۔ ساتھ ہی، ہر فائنلسٹ کو بھی نوازا جائے گا۔ اس موقع پر آرٹ، کلچر اینڈ لینگویج کے وزیر کپل مشرا نے کہا کہ دہلی ‘کریٹیو کیپٹل’ (تخلیقی دارالحکومت) اور ‘یوتھ کیپٹل’ (نوجوانوں کا دارالحکومت) بن رہی ہے۔ انٹرنیشنل فلم فیسٹیول آف دہلی کے شاندار اور کامیاب انعقاد کے بعد اب دہلی ‘دہلی ٹیلنٹ ہنٹ – حوصلوں کی اڑان’ جیسے بڑے ایونٹ کے لیے تیار ہے۔ ‘آتم نربھر بھارت’ کے عزم کی سمت میں یہ پہل دہلی کے نوجوانوں کو اپنے فن، تخلیقی صلاحیتوں اور ہنر کو ایک بڑے پلیٹ فارم پر ظاہر کرنے کا سنہرا موقع فراہم کرے گی اور ان کے خود کفیل بننے کا راستہ ہموار کرے گی۔ دہلی ٹیلنٹ ہنٹ کا مقصد صرف صلاحیت کی تلاش کرنا نہیں، بلکہ اسے مناسب رہنمائی، پہچان اور موقع فراہم کرنا بھی ہے۔