’خلاف ورزی کرنے والوں کیخلاف شفاف کارروائی کو یقینی بنانے کے لیے مکمل طور پر۱۰۰ فیصد ای۔چالان نظام اختیار‘
(ویب ڈسیک )
سرینگر؍۱۸مئی
جموں و کشمیر ٹریفک پولیس کو ٹریفک نگرانی، نظم و نسق اور قوانین کے مؤثر نفاذ کو مضبوط بنانے کے لیے۳۵۰ جدید گاڑیاں اور۶۸۵باڈی وارن کیمرے فراہم کیے گئے ہیں۔ حکام کے مطابق ان میں انٹرسیپٹر گاڑیاں، ہائی وے پٹرول یونٹس اور دیگر جدید روڈ سیفٹی آلات شامل ہیں۔
حکام نے بتایا کہ گزشتہ تین برسوں کے دوران جدید آلات کی شمولیت، سخت نفاذی اقدامات، بیداری مہمات اور روڈ سیفٹی بنیادی ڈھانچے کو مضبوط بنانے کی وجہ سے جموں و کشمیر میں ٹریفک حادثات میں مسلسل کمی درج کی گئی ہے۔
انہوں نے کہا، ’’روڈ سیفٹی فنڈ کے تحت۳۵۰سے زائد گاڑیاں اور ایک ہزار سے زیادہ نفاذی آلات خریدے گئے ہیں تاکہ نفاذی صلاحیتوں کو بہتر بنایا جا سکے اور پورے جموں و کشمیر میں روڈ سیفٹی اقدامات پر مؤثر عمل درآمد یقینی بنایا جا سکے۔‘‘
سرکاری اعداد و شمار کے مطابق محکمہ نے فیلڈ انفورسمنٹ اور ہائی وے مینجمنٹ کیلئے۲۱۳ پلسر موٹر سائیکلیں‘۶۹ رائل انفیلڈ موٹر سائیکلیں‘۱۹موبائل انٹرسیپٹر گاڑیاں‘۱۶ ہائی وے پٹرول اِنّووا گاڑیاں‘۷ ہائیڈرا کرینیں‘۲۳ کرینیں اور۳ٹاٹا ونگر گاڑیاں خریدی ہیں۔
ٹریفک قوانین کے نفاذ کے دوران شفافیت اور جوابدہی کو بہتر بنانے کے لیے انفورسمنٹ ایجنسیوں کو۶۸۵ باڈی وارن کیمرے بھی فراہم کیے گئے ہیں۔
اس کے علاوہ محکمہ نے۱۶۲۵ ٹریفک نائٹ سیفٹی بیلٹس‘۵۶۰ آہنی بیریکیڈز‘۶۸۷؍ایل ای ڈی ٹریفک بیٹن‘۶۸۷ ٹریفک سیفٹی جیکٹس‘۴۳۷متحرک بیریکیڈز،۲۳۱ مستقل بیریکیڈز،۵۶۲ ٹریفک کونز بمعہ آہنی زنجیریں‘۶۴ بریتھ الکحل اینالائزرز اور۱۰۰فرسٹ ریسپانڈر کٹس بھی خریدی ہیں۔
حکام نے بتایا کہ ٹریفک انفورسمنٹ ایجنسیوں نے خلاف ورزی کرنے والوں کے خلاف شفاف اور ٹیکنالوجی پر مبنی کارروائی کو یقینی بنانے کے لیے مکمل طور پر۱۰۰ فیصد ای۔چالان نظام اختیار کر لیا ہے۔
سرکاری اعداد و شمار کے مطابق سال۲۰۲۵ کے دوران موٹر وہیکل محکمہ نے۵۲ہزار۵۴۳؍ ای۔چالان جاری کیے، جبکہ۲۰۲۴میں یہ تعداد۴۰ہزار۱۹۷ تھی۔
رواں برس کے دوران۱۵۲۸گاڑیاں ضبط کی گئیں‘۱۶۴۱ ڈرائیونگ لائسنس معطل کیے گئے،۱۰ہزار۴۳۹ گاڑیوں کو بلیکو لسٹ کیا گیا،۱۱۹۲ رجسٹریشن سرٹیفکیٹس منسوخ کیے گئے جبکہ۳۰۰ روٹ پرمٹس واپس لیے گئے۔
حکام کے مطابق محکمہ کو جدید بنانے اور ٹریفک خلاف ورزیوں کی روک تھام کے لیے اس کی موجودگی اور رسائی کو بڑھانے جیسے اقدامات کے نتیجے میں گزشتہ تین برسوں کے دوران سڑک حادثات میں مسلسل کمی آئی ہے۔
اعداد و شمار کے مطابق جموں و کشمیر میں سڑک حادثات کی تعداد۲۰۲۳ میں۶۱۲۰ تھی، جو۲۰۲۴میں کم ہو کر۵۷۲۶ رہ گئی اور۲۰۲۵ میں مزید کم ہو کر۵۲۸۷ تک پہنچ گئی۔
