سرینگر؍۱۸مئی
لیفٹیننٹ گورنر منوج سنہا نے آج پانتھہ چوک، سری نگر میں شری امرناتھ جی شرائن بورڈ کے یاتری نواس کا موقع پر معائنہ کیا اور جاری تعمیراتی کاموں اور یاتریوں کے لیے دستیاب سہولیات کا جائزہ لیا۔
لیفٹیننٹ گورنر نے موقع پر موجود افسران کے ساتھ بات چیت کی اور انہیں ہدایت دی کہ شری امرناتھ جی یاترا کے آغاز سے قبل تمام زیر التوا کاموں کو مکمل کرنے کے لیے تعمیراتی سرگرمیوں میں تیزی لائی جائے۔ انہوں نے بابا برفانی کے نام سے منسوب ساؤنڈ اینڈ لائٹ شو کے انتظامات کا بھی جائزہ لیا۔
سنہا کے ہمراہ ڈاکٹر مندیپ کے بھنڈاری، چیف ایگزیکٹو آفیسر ؛ مکیش گرگ، رکن شری امرناتھ جی شرائن بورڈ؛ راجیو پانڈے، ڈی آئی جی سی کے آر؛ ڈاکٹر جی وی سندیپ چکرورتی، ایس ایس پی سری نگر؛ اکشے لابرو، ڈپٹی کمشنر سری نگر اور دیگر سینئر افسران بھی موجود تھے۔
