ایجنسیز
سرینگر؍۱۴مئی
ڈائریکٹر جنرل آف پولیس (ڈی جی پی) نلین پربھات نے جمعرات کو کہا کہ پولیس پاکستان کی سرپرستی میں چلنے والی دہشت گردی اور نارکو ٹیررازم کے خلاف فیصلہ کن جنگ لڑ رہی ہے، اور سرحد پار منشیات کے نیٹ ورکس اور ان کے سرپرستوں کو سخت کارروائی کی وارننگ دی۔
پی سی آر کشمیر میں ایک پریس کانفرنس سے خطاب کرتے ہوئے ڈی جی پی نے کہا کہ ’نشہ مکت ابھیان‘ کے تحت جموں و کشمیر بھر میں انسدادِ منشیات کارروائیوں میں نمایاں شدت آئی ہے۔
پربھات نے کہا کہ۲۰۲۳سے منشیات کے خلاف جنگ میں پولیس نے ’مسلسل بہتر کارکردگی‘ کا مظاہرہ کیا ہے، خاص طور پر جائیدادوں کی ضبطی، احتیاطی نظربندیوں اور ممنوعہ اشیا کی ضبطگی کے معاملے میں۔
پولیس سربراہ نےکہا’’۲۰۲۳ سے ۲۰۲۶تک منشیات کی اسمگلنگ سے منسلک جائیدادوں کی ضبطی میں مسلسل اضافہ ہوا ہے۔ اس حوالے سے جموں و کشمیر پولیس کو۲۰۲۵ میں قومی سطح پر تیسرا مقام حاصل ہوا ہے‘‘۔
ڈی جی پی نے مزید کہا کہ۲۰۲۵کے دوران پی آئی ٹی-این ڈی پی ایس کے تحت۲۴۰ احتیاطی نظربندیاں عمل میں لائی گئیں، جس میں جموں و کشمیر پولیس ملک بھر میں پہلے نمبر پر رہی۔
پربھات نے کہا’’خصوصی طور پر نشہ مکت ابھیان کے تحت گزشتہ برس کے مقابلے میں این ڈی پی ایس مقدمات میں تقریباً سات گنا اضافہ درج کیا گیا ہے‘‘۔انہوں نے بتایا کہ جموں و کشمیر بھر میں درج۷۲۴؍ این ڈی پی ایس مقدمات میں منشیات کے کاروبار سے وابستہ۸۰۶؍افراد کو گرفتار کیا گیا ہے۔
پولیس سربراہ نے کہا’’اہم گرفتاریوں میں گلزار احمد عرف لوو گجر شامل ہے، جو۲۸ مقدمات میں مطلوب تھا، جبکہ جموں صوبے میں اوینیت سنگھ عرف ناگی۱۷مقدمات میں مطلوب تھا‘‘۔
ڈی جی پی کے مطابق مہم کے دوران پولیس نے۶۶۷ کلوگرام منشیات اور۹۰ہزار سے زائد نفسیاتی اثر رکھنے والی اشیا برآمد کیں۔انہوں نے کہا’’۲۴عادی منشیات فروشوں کے خلاف احتیاطی کارروائی بھی کی گئی ہے‘‘۔انہوں نے مزید بتایا کہ اب تک منشیات کی اسمگلنگ سے منسلک۹۷جائیدادوں کی نشاندہی کر کے انہیں ضبط کیا گیا ہے، جن کی مالیت۴۱ء۸۵کروڑ روپے ہے۔
پربھات نے کہا’’اننت ناگ پولیس نے ایک ہی مقدمے میں۶ء۱۷کروڑ روپے مالیت کی جائیداد ضبط کی۔ پہلی مرتبہ جموں و کشمیر پولیس نے ریاست کی حدود سے باہر واقع جائیدادیں بھی ضبط کی ہیں، جن میں گورداسپور، پٹھان کوٹ اور چندی گڑھ میں ایک ایک جائیداد شامل ہے‘‘۔
پولیس سربراہ نے مزید کہا کہ کُلگام پولیس نے بھی نارکوٹکس مقدمات میں پسِ پردہ روابط قائم کرنے کے لیے جموں کے بینی چرانہ علاقے میں۹۳لاکھ روپے مالیت کی جائیداد ضبط کی۔
ڈی جی پی نے کہا کہ قانونی تقاضے پورے کرنے کے بعد منشیات کے کاروبار سے حاصل شدہ آمدنی قرار دی گئی تقریباً۱۵کروڑ روپے مالیت کی۴۱جائیدادیں بھی منہدم کی گئی ہیں۔
پولیس سربراہ نے کہا’’مہم کے دوران۱۱۷ کنال اراضی پر پھیلی غیر قانونی پوست اور بھنگ کی کاشت کو بھی تباہ کیا گیا‘‘۔انہوں نے مزید کہا کہ فارماسیوٹیکل اداروں کی خصوصی جانچ بھی کی گئی۔
ان کے مطابق’’کم از کم۵۲۳۸ کیمسٹ اور میڈیکل دکانوں کی جانچ کی گئی، جبکہ۱۵۱خلاف ورزی کرنے والے اداروں کے خلاف کارروائی شروع کی گئی۔ مہم کے دوران۴۹۶۲کلوگرام منشیات اور۶۴۹۳نفسیاتی اثر رکھنے والی اشیا کو تلف کیا گیا‘‘۔
پر بھات نے کہا کہ منشیات سے متعلق مقدمات میں ملوث۱۶۲؍افراد کے ڈرائیونگ لائسنس یا تو منسوخ یا معطل کیے گئے، جبکہ منشیات کی اسمگلنگ میں استعمال ہونے والی۹۲گاڑیوں کے رجسٹریشن سرٹیفکیٹس بھی منسوخ یا معطل کیے گئے۔انہوں نے مزید بتایا کہ منشیات سے متعلق سرگرمیوں میں ملوث۱۰؍افراد کے پاسپورٹ ضبط کرنے کی سفارش بھی کی گئی ہے۔
