ایجنسیز
سرینگر؍۲ مئی
حکام کے مطابق ہفتہ کے روز جموں و کشمیر میں موبائل فون صارفین کو اچانک ایک ہنگامی الرٹ موصول ہوا، کیونکہ بھارت نے اپنے ملک گیر ایمرجنسی الرٹ سسٹم کا تجربہ کیا۔
حکام نے بتایا کہ ہفتہ کی صبح موبائل فون صارفین اس وقت حیران رہ گئے جب ان کے فونز زور سے بجنے لگے اور ایک فلیش پیغام موصول ہوا۔انہوں نے کہا کہ یہ الرٹ صبح۱۱ بج کر۴۲منٹ پر بھیجا گیا تھا اور یہ ایمرجنسی الرٹ سسٹم کی جانچ کا حصہ تھا۔
حکام کے مطابق’’یہ ایمرجنسی الرٹ سسٹم کی جانچ کا حصہ ہے تاکہ آفات کے دوران بروقت اور درست معلومات فراہم کی جا سکیں‘‘۔انہوں نے مزید کہا کہ یہ پیغام بار بار ظاہر ہو سکتا ہے اور عوام سے کہا گیا ہے کہ اس پر کوئی کارروائی نہ کریں۔
فلیش پیغام میں کہا گیا’’بھارت نے اپنے شہریوں کے لیے فوری آفات سے متعلق اطلاع دینے کی سروس کے لیے مقامی ٹیکنالوجی کے ذریعے سیل براڈکاسٹ سروس شروع کی ہے۔ باخبر شہری، محفوظ قوم۔ اس پیغام کے موصول ہونے پر عوام کو کسی کارروائی کی ضرورت نہیں۔ یہ ایک آزمائشی پیغام ہے۔ حکومتِ ہند۔‘‘
ایک مقامی موبائل صارف معراج احمد نے بتایا کہ جب ان کے فون سے اچانک تیز آواز آئی تو وہ حیران رہ گئے۔انہوں نے کہا’’جب پیغام آیا تو میں حیران رہ گیا۔ مجھے اس کے بارے میں معلوم نہیں تھا۔ فون کی تیز آواز سے میں چونک گیا، پھر پیغام پڑھ کر سمجھ آیا‘‘۔
انہوں نے کہا کہ کسی بھی ہنگامی صورتحال میں لوگوں کو آگاہ کرنے کے لیے یہ ایک اچھا اقدام ہے۔ حکومت پہلے ہی ملک بھر میں موبائل پر مبنی ڈیزاسٹر الرٹ سسٹم کی آزمائش سے متعلق شہریوں کو آگاہ کر چکی تھی اور ٹیسٹ پیغامات کو نظر انداز کرنے کی ہدایت دی تھی۔
