انڈر-17 ایشیا کپ کے لیے ہندوستانی ٹیم کا اعلان

نئی دہلی، یکم مئی (یو این آئی) ہندوستان کی انڈر-17 مردوں کی قومی ٹیم کے ہیڈ کوچ بیبیانو فرنانڈس نے اے ایف سی انڈر-17 ایشیا کپ سعودی عرب 2026 کے لیے جمعہ کو 23 رکنی ٹیم کا اعلان کر دیا ہے۔
‘بلیو کولٹس’ (ہندوستان کی انڈر-17 ٹیم) اس وقت دوحہ، قطر میں موجود ہے، جہاں انہوں نے قطر کے خلاف بند دروازوں کے پیچھے دو دوستانہ میچ (1-1 اور 0-0) کھیلے ہیں۔ ٹیم 3 مئی کو جدہ، سعودی عرب کے لیے روانہ ہوگی۔
ہندوستان کو گروپ ڈی میں رکھا گیا ہے، جہاں اس کے ساتھ آسٹریلیا اور ازبکستان کی ٹیمیں شامل ہیں۔ اس گروپ کی چوتھی ٹیم، جمہوریہ کوریا نے ٹورنامنٹ سے دستبرداری اختیار کر لی ہے، جس کے بعد اب یہ تین ٹیموں کا گروپ بن گیا ہے۔ بیبیانو کی ٹیم 6 مئی کو آسٹریلیا اور 10 مئی کو ازبکستان کے خلاف میدان میں اترے گی۔
اس گروپ سے ٹاپ دو ٹیمیں کوارٹر فائنل میں پہنچیں گی، جس کے ساتھ ہی فیفا انڈر-17 ورلڈ کپ قطر 2026 کے لیے بھی ان کی جگہ یقینی ہو جائے گی۔