ریکھا گپتا نے جی ایس ٹی محکمہ میں ‘لاٹری سسٹم’ کے ذریعے افسران کی تعیناتی کی

نئی دہلی، 29 اپریل (یو این آئی) دہلی کی وزیر اعلیٰ ریکھا گپتا نے بدھ کے روز کہا کہ ان کی حکومت انتظامی نظام کو مزید شفاف، جوابدہ اور بدعنوانی سے پاک بنانے کے لیے مسلسل ٹھوس اور اختراعی اقدامات کر رہی ہے۔
محترمہ گپتا نے آج کہا کہ حکومت انتظامی ڈھانچے کو بہتر بنانے کے لیے کوشاں ہے اور اسی سلسلے میں محکمہ تجارت و ٹیکس نے پہلی بار نئے آنے والے جی ایس ٹی افسران اور انسپکٹرز کو ان کی تعیناتی (پوسٹنگ) لاٹری سسٹم (ڈرا آف لاٹس) کے ذریعے کی ہے۔ وزیر اعلیٰ کا کہنا ہے کہ یہ ایک نیا اور اہم قدم ہے۔ انہوں نے بتایا کہ یہ تمام افسران 23 اپریل کے سروس آرڈر کے تحت محکمہ میں منتقل ہو کر آئے تھے اور کل 87 جی ایس ٹی افسران اور انسپکٹرز کو اس عمل کے تحت مختلف وارڈز میں تعینات کیا گیا ہے۔ یہ پورا عمل محکمہ کے کانفرنس ہال میں منعقد ہوا، جس میں تمام نئے افسران و ملازمین اور محکمہ کے اعلیٰ حکام بشمول کمشنر، اسپیشل کمشنر، جوائنٹ کمشنر اور اسسٹنٹ کمشنر موجود تھے۔ میٹنگ میں اس بات کو یقینی بنایا گیا کہ پورا عمل سب کے سامنے کھلے اور شفاف طریقے سے مکمل ہو، تاکہ کسی بھی قسم کے شک یا جانبداری کا امکان ختم ہو سکے۔
وزیر اعلیٰ نے بتایا کہ پوسٹنگ کے عمل کو غیر جانبدارانہ بنانے کے لیے خاص طور پر لاٹری کا طریقہ اپنایا گیا، جس میں ہر افسر نے خود پرچی نکالی۔ اس مقصد کے لیے دو الگ الگ باکس رکھے گئے تھے، ایک باکس میں افسران و ملازمین کے نام اور دوسرے باکس میں خالی وارڈ نمبرز کی پرچیاں تھیں جہاں اسامیاں دستیاب تھیں۔ دونوں باکس سے پرچی نکالنے کے بعد ہی متعلقہ افسر کا وارڈ طے ہوا۔ اس عمل نے مکمل طور پر غیر جانبداری، شفافیت اور مساوی مواقع کو یقینی بنایا۔ انہوں نے کہا کہ پوری کارروائی کی شروع سے آخر تک ویڈیو گرافی کرائی گئی تاکہ ہر مرحلے کا سرکاری ریکارڈ محفوظ رکھا جا سکے اور مستقبل میں کسی بھی سطح پر تصدیق ممکن ہو۔ سینئر افسران کی نگرانی میں اس عمل کی تکمیل سے ادارہ جاتی ساکھ اور انتظامی دیانت داری کو مزید تقویت ملی ہے۔
وزیر اعلیٰ نے مزید کہا کہ دہلی حکومت بدعنوانی پر ‘زیرو ٹولرینس’ کی پالیسی پر کام کر رہی ہے اور یہ پہل اسی سمت میں ایک مضبوط قدم ہے۔ حکومت کا ہدف ہے کہ ہر تقرری، پوسٹنگ اور انتظامی فیصلہ مکمل طور پر منصفانہ اور ضابطہ پر مبنی ہو تاکہ ایماندار افسران کی حوصلہ افزائی ہو اور نظام میں عوام کا اعتماد مزید مضبوط ہو۔