ایس سی او کے وزرائے دفاع کی میٹنگ میں کل ہندوستان کی نمائندگی کریں گے راج ناتھ

نئی دہلی، 27 اپریل (یو این آئی) وزیر دفاع راج ناتھ سنگھ منگل کو کرغزستان کے بشکیک میں شنگھائی تعاون تنظیم (ایس سی او) کے وزرائے دفاع کی میٹنگ میں ایک اعلیٰ سطحی ہندوستانی وفد کی قیادت کریں گے۔
میٹنگ کے دوران مختلف رکن ممالک کے وزرائے دفاع خطے کے دفاع اور سلامتی سے متعلق متعدد امور پر تبادلہ خیال کریں گے۔ بین الاقوامی امن، انسداد دہشت گردی کی کوششوں اور ایس سی او کے رکن ممالک کے درمیان دفاعی تعاون سے متعلق موضوعات پر بھی بات چیت کی جائے گی۔
اس سال کا ایس سی او میٹنگ مغربی ایشیا کی صورتحال کے باعث پیدا ہونے والے جغرافیائی سیاسی عدم استحکام کے تناظر میں منعقد ہو رہی ہے۔ خطے کی سب سے بڑی سیاسی اور اقتصادی تنظیموں میں سے ایک، ایس سی او اس تنازع کے اثرات کو کم کرنے کے اقدامات پر بھی غور کر سکتی ہے۔
وزیر دفاع عالمی سکیورٹی چیلنجوں کے درمیان عالمی امن کے تئیں ہندوستان کے عزم کو اجاگر کریں گے اور دہشت گردی و انتہا پسندی کے خلاف ہندوستان کے ‘ قطعی برداشت نہ کرنے ‘ کے سخت موقف کا اعادہ کریں گے۔ میٹنگ کے دوران مسٹر سنگھ بعض شریک ممالک کے اپنے ہم منصبوں کے ساتھ دوطرفہ بات چیت بھی کر سکتے ہیں۔
ایس سی او ایک بین حکومتی تنظیم ہے، جس کا قیام 15 جون 2001 کو چین کے شہر شنگھائی میں عمل میں آیا تھا۔ اس کے رکن ممالک میں ہندوستان، روس، چین، قزاخستان، کرغزستان، پاکستان، تاجکستان، ازبکستان، ایران اور بیلاروس شامل ہیں۔ ہندوستان 2017 میں اس کا مستقل رکن بنا اور 2023 میں اس کی صدارت سنبھالی۔