سرینگر؍۲۲؍اپریل
انڈین ریلوے کے جموں ڈویژن نے گجرات سے پہلی بار خصوصی دودھ بردار مال گاڑی کی آمد کو ممکن بنا کر ایک اہم سنگِ میل حاصل کیا ہے، جس سے جموں و کشمیر میں ڈیری مصنوعات کی بلا رکاوٹ فراہمی کو یقینی بنایا جائے گا۔
ریلوے حکام نے اس پیش رفت کو ’تاریخی کامیابی‘ قرار دیتے ہوئے کہا کہ اس اقدام سے نہ صرف غذائی تحفظ مضبوط ہوگا بلکہ خطے میں غذائیت سے بھرپور ڈیری مصنوعات کی مسلسل دستیابی بھی یقینی بنے گی۔
یہ خصوصی مال گاڑی، جس میں۲۰بی سی این ویگنز شامل تھیں، گجرات کوآپریٹو ملک مارکیٹنگ فیڈریشن (امول) کی ڈیری مصنوعات لے کر احمد آباد ڈویژن کے لنچ گڈز شیڈ سے۲۰؍ اپریل کو روانہ ہوئی اور جموں ڈویژن کے باری برہمنہ اور اننت ناگ گڈز شیڈز تک پہنچی۔
حکام کے مطابق۱۰ ویگنز باری برہمنہ میں جبکہ باقی۱۰ ؍اننت ناگ میں اتاری گئیں، جن میں ہر کھیپ تقریباً۵۰۰ٹن ڈیری ۱۰مصنوعات پر مشتمل تھی۔ ان میں دودھ، دودھ پاؤڈر، لسی، چھاچھ اور دیگر ضروری اشیاء شامل تھیں۔
سینئر ڈویژنل کمرشل منیجر اچت سنگھل نے کہا’’یہ جموں ڈویژن کے لیے ایک فخر اور تاریخی لمحہ ہے۔ امول کی ڈیری مصنوعات سے بھری پہلی خصوصی مال گاڑی کی آمد شہریوں، تاجروں اور خاندانوں کی ضروریات کو مدنظر رکھتے ہوئے منصوبہ بندی کی گئی ہے، جس سے تازہ ڈیری مصنوعات کی مسلسل دستیابی یقینی بنے گی‘‘۔
سنگھل نے کہا کہ براہ راست ریلوے رابطے سے سڑک کے مقابلے میں نقل و حمل کی لاگت اور وقت میں نمایاں کمی آئے گی، جس سے مقامی منڈیوں اور صارفین کو فائدہ پہنچے گا۔
حکام نے یہ بھی یاد دلایا کہ اکتوبر۲۰۲۵میں اسی ڈویژن نے ایک اور سنگِ میل حاصل کیا تھا جب۱۳۵۰ ٹن صنعتی نمک کی کھیپ گجرات کے کھراغوڑہ سے اننت ناگ تک ریل کے ذریعے پہنچائی گئی تھی۔
اس نئے اقدام سے گجرات اور جموں و کشمیر کے درمیان تجارتی و اقتصادی تعلقات مزید مضبوط ہونے کی توقع ہے، جبکہ وادی کشمیر کو براہ راست ڈیری اور صنعتی شعبوں سے جوڑا جائے گا۔
ادھر جموں سے سری نگر تک براہ راست ریل سروس کے آغاز کا بھی انتظار ختم ہونے والا ہے۔ اطلاعات کے مطابق۳۰؍اپریل کو وزیر ریلوے اشونی ویشنو، وزیر مملکت برائے وزیراعظم دفتر ڈاکٹر جتیندر سنگھ کے ہمراہ، جموں ریلوے اسٹیشن سے وندے بھارت ایکسپریس کو جھنڈی دکھا کر روانہ کریں گے۔
ذرائع کے مطابق تمام تیاریاں مکمل ہو چکی ہیں، ٹرینیں اور ٹریک تیار ہیں، ٹرائل رنز کامیاب رہے ہیں اور سکیورٹی انتظامات بھی مکمل ہیں۔
فی الحال دو وندے بھارت ایکسپریس ٹرینیں کٹرا اور سری نگر کے درمیان چل رہی ہیں، جنہیں اب جموں تک توسیع دی جائے گی۔ اس کے علاوہ دو ٹرینیں نئی دہلی اور کٹرا کے درمیان بھی چل رہی ہیں۔
براہ راست جموں،سرینگر ریل سروس سے دونوں دارالحکومتوں کے درمیان سفر کا وقت نمایاں طور پر کم ہو جائے گا اور رابطہ مزید بہتر ہوگا۔
یہ سروس ایسے وقت شروع کی جا رہی ہے جب سول سیکریٹریٹ موسمِ سرما کے دارالحکومت جموں سے موسمِ گرما کے دارالحکومت سری نگر منتقل ہونے والا ہے۔ پانچ روزہ ہفتہ والے دفاتر۳۰؍ اپریل جبکہ چھ روزہ ہفتہ والے دفاتر۲مئی کو بند ہوں گے، اور۴مئی سے سری نگر میں دوبارہ کام شروع ہوگا۔
