’نجی اسکول والدین کو مہنگی کتابیں خریدنے پر مجبور نہ کریں ‘

سرینگر؍۲۲؍ اپریل
جموں و کشمیر کی فیس فکسیشن اینڈ ریگولیشن کمیٹی نے نجی اسکولوں کو سخت ہدایت جاری کرتے ہوئے خبردار کیا ہے کہ وہ والدین کو مہنگی کتابیں خریدنے پر مجبور نہ کریں، بصورت دیگر سخت کارروائی کی جائے گی۔
ایک جاری کردہ سرکلر کے مطابق، شکایات موصول ہوئی ہیں کہ کچھ اسکول والدین کو تقریباً۳۵۰۰ روپے مالیت کی کتابیں خریدنے پر مجبور کر رہے ہیں اور مبینہ طور پر نجی پبلشرز کے ساتھ گٹھ جوڑ کے ذریعے مالی فائدہ حاصل کر رہے ہیں۔ کمیٹی نے اس عمل کو منافع خوری قرار دیتے ہوئے کہا کہ اس سے والدین پر غیر ضروری مالی بوجھ پڑتا ہے۔
ایف ایف آر سی نے واضح کیا کہ سی بی ایس ای اور جے کے بورڈ جیسے الحاقی اداروں کی ہدایات کے مطابق صرف این سی ای آر ٹی کی مقرر کردہ کتابیں ہی منظور شدہ نصاب کا حصہ ہیں، اور نجی اسکولوں کو اضافی یا مہنگی کتابیں لازمی قرار دینے کا کوئی اختیار نہیں ہے۔
کمیٹی نے تمام نجی اسکولوں کو ہدایت دی ہے کہ وہ ان اصولوں پر سختی سے عمل کریں اور تعمیل کی رپورٹ جمع کریں، بصورت دیگر خلاف ورزی کرنے والے اداروں کے خلاف شناخت ختم کرنے (ڈی-ریکگنیشن) سمیت سخت کارروائی کی جا سکتی ہے۔ویب ڈیسک