پولیس کا ریاسی میں اہم تنصیبات کی سکیورٹی کا جائزہ

جموں؍۲۱؍اپریل
جموں و کشمیر کے ضلع ریاسی میں منگل کے روز ایک اعلیٰ سطحی معائنہ کے دوران کئی اہم تنصیبات، بشمول دریائے چناب پر دنیا کے بلند ترین ریلوے آرچ پل، کی سکیورٹی کا جائزہ لیا گیا، پولیس نے بتایا۔
پولیس ترجمان نے کہا کہ سینئر سپرنٹنڈنٹ آف پولیس ریاسی، مکند تبریوال نے چناب پل، ڈگہ ریلوے اسٹیشن اور ارناس سب ڈویژن میں واقع ساولاکوٹ ہائیڈرو الیکٹرک پروجیکٹ کی سکیورٹی کا تفصیلی جائزہ لیا۔
کوری اور باکل کو جوڑنے والے چناب پل پر ایس ایس پی نے سی آر پی ایف اور گورنمنٹ ریلوے پولیس (جی آر پی) کے اہلکاروں سے بات چیت کی، جو پل اور اس کے اطراف کی حفاظت پر مامور ہیں، اور قریبی دیہات اور جنگلاتی علاقوں میں مؤثر مشترکہ نگرانی کے لیے مختلف ایجنسیوں کے درمیان مضبوط ہم آہنگی پر زور دیا۔
تبریوال نے کسی بھی ناخوشگوار واقعے سے بچنے کے لیے سخت رسائی کنٹرول اقدامات اور جدید نگرانی نظام کے استعمال کی ہدایت بھی دی، ترجمان نے کہا۔ ڈگہ اسٹیشن اور ساولاکوٹ میں بھی انہوں نے تعینات سکیورٹی اہلکاروں اور ولیج ڈیفنس گروپس کے ارکان سے ملاقات کی۔
انہوں نے ہدایت دی کہ علاقے میں کی جانے والی تمام نگرانی سرگرمیوں کو روزانہ کی بنیاد پر دستاویزی شکل دی جائے اور ولیج ڈیفنس گارڈز کے لیے باقاعدہ تربیت، بشمول فائرنگ پریکٹس، کو یقینی بنایا جائے۔
ایس ایس پی نے دھنسال پولیس پوسٹ اور ارناس پولیس اسٹیشن کا بھی دورہ کیا۔ ارناس پولیس اسٹیشن میں انہوں نے پولیس ریکارڈ کی بہتر دیکھ بھال اور احاطے کی صفائی کو یقینی بنانے کی ہدایات جاری کیں۔ تفتیشی افسران کو زیر التوا مقدمات کو کم کرنے کے لیے انکوائریوں میں تیزی لانے، لاپتہ افراد کا سراغ لگانے اور مفرور ملزمان کی گرفتاری پر توجہ دینے کی ہدایت دی گئی، ترجمان نے کہا۔
ایس ایس پی نے کہا کہ اہم تنصیبات، بشمول مذہبی مقامات، کی سکیورٹی ضلع کی اولین ترجیح ہے۔ایجنسیز