دہلی کیپٹلز نے رائل چیلنجرز بنگلورو کو 6 وکٹوں سے شکست دے دی

بنگلورو، 18 اپریل (یو این آئی) گیندبازوں کی شاندار کارکردگی کے بعد ٹرسٹن اسٹبس (ناٹ آؤٹ 60)، کے ایل راہل (57) اور ڈیوڈ ملر (ناٹ آؤٹ 22) کی عمدہ اننگز کی بدولت دہلی کیپٹلز نے آئی پی ایل 2026 کے 26ویں میچ میں رائل چیلنجرز بنگلورو کو ایک گیند باقی رہتے 6 وکٹوں سے شکست دے دی۔
ڈیوڈ ملر نے آخری اوور میں دو چھکے اور ایک چوکا لگا کر ٹیم کو 19.5 اوورز میں ہدف تک پہنچایا۔ یہ ٹورنامنٹ میں دہلی کیپٹلز کی تیسری جیت ہے۔
176 رنز کے ہدف کے تعاقب میں دہلی کیپٹلز کی شروعات خراب رہی اور بھونیشور کمار نے ابتدائی جھٹکے دیتے ہوئے پاتھم نسینکا (1)، کرون نائر (5) اور سمیر رضوی (2) کو آؤٹ کیا۔ ایک موقع پر دہلی نے 18 رنز پر تین وکٹیں گنوا دی تھیں۔
مشکل صورتحال میں ٹرسٹن اسٹبس اور کے ایل راہل نے اننگز کو سنبھالا اور چوتھی وکٹ کے لیے 69 رنز کی شراکت قائم کی۔ کرنال پانڈیا نے راہل کو آؤٹ کر کے اس شراکت کو توڑا۔ راہل نے 34 گیندوں پر 6 چوکوں اور 2 چھکوں کی مدد سے 57 رنز بنائے۔
بعد ازاں کپتان اکشر پٹیل 26 رنز بنا کر ریٹائرڈ ہرٹ ہو گئے، تاہم اسٹبس اور ملر نے ذمہ داری سنبھالتے ہوئے ٹیم کو جیت دلائی۔ اسٹبس نے 47 گیندوں پر 60 رنز کی ناٹ آؤٹ اننگز کھیلی جبکہ ملر نے 10 گیندوں پر 22 رنز بنائے۔
آر سی بی کی جانب سے بھونیشور کمار نے تین وکٹیں حاصل کیں جبکہ کرنال پانڈیا نے ایک کھلاڑی کو آؤٹ کیا۔
اس سے قبل آر سی بی نے ٹاس ہار کر پہلے بیٹنگ کرتے ہوئے 20 اوورز میں 8 وکٹوں پر 175 رنز بنائے۔ فل سالٹ (63) نے نمایاں اننگز کھیلی جبکہ وراٹ کوہلی نے 19 رنز بنائے۔
دہلی کی جانب سے کلدیپ یادو، لنگی اینگیڈی اور اکشر پٹیل نے دو، دو وکٹیں حاصل کیں جبکہ مکیش کمار نے ایک کھلاڑی کو آؤٹ کیا۔