سنہا کا بے لوث خدمت پر زور، منشیات کیخلاف جدوجہد کی اپیل
ڈی آئی پی آر
جموں؍۱۴؍اپریل
جموں کشمیر کے لیفٹیننٹ گورنر‘ منوج سنہا نے منگل کو بے لوث خدمت کی اہمیت پر زور دیتے ہوئے عوام سے اپیل کی کہ وہ معاشرے، شہر اور ملک کی فلاح کے لیے اجتماعی طور پر کام کریں۔
گورنمنٹ میڈیکل کالج جموں میں ’اپنا بھوجنالیا‘ کی اپ گریڈیشن کے موقع پر منعقدہ تقریب سے خطاب کرتے ہوئے انہوں نے لوگوں سے کہا کہ وہ ضرورت مندوں کو کھانا فراہم کرنے کے مشن کے لیے خود کو وقف کریں اور ایک ایسا ورثہ قائم کریں جس پر فخر کیا جا سکے۔
لیفٹیننٹ گورنر نے معاشرے کے تمام طبقات سے منشیات کے خلاف جنگ میں متحد ہونے کی اپیل بھی کی۔
سنہا نے کہا’’ہمارا مقصد اپنے پڑوسیوں، اپنے شہر اور اس قوم کی بے لوث خدمت ہونا چاہیے جو ہمیں جوڑتی ہے۔ ایک مضبوط جموں و کشمیر کا مطلب مضبوط خاندان اور مضبوط برادریاں ہیں… جب ہم ہر شعبے کو اٹھاتے ہیں تو ہم پورے یونین ٹیریٹری کو بلند کرتے ہیں‘‘۔
ایل جی نے کہا’’ضرورت مندوں کی خدمت سے بڑھ کر کوئی فریضہ نہیں۔ سیوا بھارتی نے اس فریضے کو نبھاتے ہوئے جسموں کو غذا فراہم کی، روحوں کو تسکین دی اور ہر انسانی زندگی کے وقار کو برقرار رکھا۔ اپنا بھوجنالیا کو مضبوط کرنا دراصل ہمارے معاشرے کی بنیاد کو مضبوط کرنا ہے‘‘۔
لیفٹیننٹ گورنر نے کہا کہ بھوکے کو کھانا کھلانا سب سے مقدس عملوں میں سے ایک ہے۔
سنہا نے کہا’’بھوکوں کو کھانا فراہم کرنا انسان کے اعلیٰ ترین اعمال میں شمار ہوتا ہے۔ جب ایک ہاتھ ضرورت کے لیے بڑھتا ہے اور دوسرا ہاتھ مدد کے لیے آگے آتا ہے تو ان کے درمیان خاموشی سے خدائی رحمت کا نزول ہوتا ہے۔ یہ عمل صرف ہمدردی نہیں بلکہ انسانیت کی بہترین مثال ہے‘‘۔
ایل جی نے مزید کہا کہ تبدیلی کے لیے بڑے وسائل نہیں بلکہ بے لوث خدمت کا جذبہ، وژن، ثابت قدمی اور برادری سے محبت درکار ہوتی ہے۔
لیفٹیننٹ گورنر نے سیوا بھارتی، رضاکاروں اور عطیہ دہندگان کی تعریف کرتے ہوئے کہا کہ انہوں نے اپنی بے لوث خدمت کے ذریعے لاکھوں لوگوں کی زندگیوں میں تبدیلی لائی ہے۔
سنہا نے کہا’’آپ نے صرف بھوکوں کو کھانا نہیں کھلایا بلکہ لاکھوں لوگوں کے وقار کو برقرار رکھا۔ آج ہم عہد کریں کہ یہ خدمت کبھی رکے گی نہیں۔ اپنا بھوجنالیا کا کچن کبھی ٹھنڈا نہیں پڑے گا اور معاشرے کا ہر فرد اپنی استطاعت کے مطابق ضرورت مندوں کی مدد کرے گا‘‘۔
اس موقع پر لیفٹیننٹ گورنر نے ایک بار پھر معاشرے کے ہر طبقے سے منشیات کے خلاف جدوجہد میں شامل ہونے کی اپیل کی۔
تقریب میں سیوا بھارتی کے عہدیداران اور رضاکاروں کے علاوہ متعدد معزز شخصیات، عوامی نمائندگان اور سینئر افسران نے شرکت کی۔
