نئی دہلی؍۱۴؍ اپریل
مرکزی وزیر داخلہ‘ امت شاہ نے منگل کو کہا کہ بابا صاحب بھیم راؤ امبیڈکر نے بھارت کی سالمیت کے لیے آئین کے آرٹیکل۳۷۰کی سخت مخالفت کی تھی۔
امبیڈکر کی یومِ پیدائش کے موقع پر ایکس پر اپنی پوسٹ میں شاہ نے کہا کہ انہوں نے ملک کو ایسا آئین دے کر ہندوستانی جمہوریت کی مضبوط بنیاد رکھی جو ہر طبقے کو مساوی حقوق اور مواقع فراہم کرتا ہے۔
وفاقی وزیر داخلہ نے اپنی ہندی پوسٹ میں کہا’’انہوں نے ملک کی سالمیت کے لیے آرٹیکل۳۷۰کی سخت مخالفت کی۔ بابا صاحب، جنہوں نے سماج کو تعلیم حاصل کرنے اور منظم رہنے کا منتر دیا، ہمیں اپنی زندگی کے ذریعے یہ سکھاتے ہیں کہ جب عزم قومی خدمت اور عوامی فلاح کے لیے ہو تو ہر رکاوٹ چھوٹی ہو جاتی ہے‘‘۔
شاہ نے خالصہ پنتھ کے یومِ تاسیس اور بیساکھی کے موقع پر بھی لوگوں کو مبارکباد پیش کی۔
ایکس پر ایک اور پوسٹ میں انہوں نے کہا’’خالصہ پنتھ کے یومِ تاسیس اور بیساکھی کے تہوار پر سب کو دل کی گہرائیوں سے مبارکباد۔ یہ مقدس دن ہمیں شری گرو گوبند سنگھ جی کی جانب سے خالصہ پنتھ کے قیام کی یاد دلاتا ہے، جو ہمیں سچائی اور راست بازی کے راستے پر بے خوفی سے چلنے کا حوصلہ دیتا ہے‘‘۔
شاہ نے کہا کہ بیساکھی بھارت کے محنتی کسانوں کی خوشی کا بھی تہوار ہے، جن کی محنت ملک بھر میں خوشحالی لاتی ہے۔
وزیر داخلہ نے مزید کہا’’اس مقدس اور بابرکت موقع پر میں خالصہ پنتھ کو دل کی گہرائیوں سے مبارکباد پیش کرتا ہوں اور اپنے انّ داتاؤں کی انتھک محنت کو سلام پیش کرتا ہوں‘‘۔
شاہ نے تمل ناڈو کے لوگوں کو تمل پُتھاندو کے موقع پر بھی مبارکباد دی۔انہوں نے ایک اور پوسٹ میں کہا’’نئے سال کے استقبال کی یہ پُرجوش تقریبات ہمارے ثقافتی رشتوں کو مزید مضبوط کریں، سماجی یکجہتی کو فروغ دیں اور سب کو خوشحالی، فراوانی اور مسرت سے نوازیں‘‘۔ت کے
وزیر داخلہ نے اڈیشہ کے عوام کو مہا وشوبا سنکرانتی کے موقع پر بھی مبارکباد دی۔ انہوں نے کہا’’پربھو جگن ناتھ کی برکتیں سب کے لیے خوشی اور صحت کا باعث بنیں۔‘‘
