ایجنسیز
جموں؍۱۳؍اپریل
سرینگر کی خصوصی انسدادِ بدعنوانی عدالت نے پیر کے روز۲۰۰۷ کے ایک رشوت کیس میں ایک سابق پٹواری کو مجرم قرار دیتے ہوئے ایک سال قید اور۱۰ہزار روپے جرمانے کی سزا سنائی۔
ایک بیان کے مطابق خصوصی جج انسدادِ بدعنوانی عدالت سرینگر تسلیم عارف نے کیس ایف آئی آر نمبر۲۰/۲۰۰۷تھانہ وی او کے (اب اے سی بی) میں فیصلہ سنایا۔ مذکورہ کیس میں ملزم غلام قادر بھٹ (سابق پٹواری حلقہ خوشی پورہ زین کوٹ)، ولد محمد اسماعیل بھٹ، ساکن نرپرستان فتح کدل سرینگر کو ایک سال قید کے ساتھ ۱۰ہزار روپے جرمانہ عائد کیا گیا۔
ترجمان کے مطابق یہ مقدمہ ایف آئی آر نمبر۲۰/۲۰۰۷زیر دفعہ۵ (۲)انسدادِ بدعنوانی ایکٹ۲۰۰۶ معہ دفعہ۱۶۱ آر پی سی کے تحت یکم اپریل ۲۰۰۷کو تھانہ وی او کے (اب اے سی بی) سرینگر میں درج کیا گیا تھا۔ اس میں الزام تھا کہ مذکورہ سرکاری ملازم نے مدعی کے حق میں زمین کی منتقلی (میوٹیشن) کرنے کے عوض۳ہزار روپے رشوت طلب کی اور وصول بھی کی۔
انہوں نے بتایا کہ تحقیقات کے دوران پولیس اسٹیشن وی او کے (اب اے سی بی) سرینگر نے زبانی اور دستاویزی شواہد کی بنیاد پر ملزم کے خلاف الزامات کو شک سے بالاتر ثابت کیا۔
ان کاکہنا تھا’’چارج شیٹ۲۹فروری۲۰۰۸ کو عدالت میں پیش کی گئی تھی تاکہ اس کا عدالتی فیصلہ کیا جا سکے‘‘۔
ترجمان نے مزید کہا کہ ملزم کو انسدادِ بدعنوانی ایکٹ کی دفعہ۵(۲)کے تحت ایک سال قید اور۱۰ہزار روپے جرمانے کی سزا سنائی گئی۔ اے سی بی سرینگر کی جانب سے مقدمے کی پیروی سینئر پراسیکیوٹنگ آفیسر وجاہت جمیل نے کی۔
