ایجنسیز
سرینگر؍۱۳ ؍اپریل
شمالی کشمیر کے قصبہ سوپور میں تعینات ایک سینئر لیکچرر کے خلاف ایک طالبہ کی جانب سے ہراسانی کے الزام کے بعد پولیس نے مقدمہ درج کر لیا ہے، جبکہ مذکورہ استاد کو معطل کر کے معاملے کی تحقیقات کا حکم بھی دے دیا گیا ہے۔
سینئر سپرنٹنڈنٹ آف پولیس سوپور، افتخار طالب نے بتایا کہ طالبہ کے الزامات کے بعد لیکچرر کے خلاف مقدمہ درج کر کے تحقیقات کا آغاز کر دیا گیا ہے۔
ادھر، ڈائریکٹوریٹ آف اسکول ایجوکیشن کشمیر نے لیکچرر کو فوری طور پر معطل کر دیا ہے اور اس کے طرزِ عمل کی انکوائری کا بھی حکم دیا ہے۔
جوائنٹ ڈائریکٹر نارتھ کو انکوائری افسر مقرر کیا گیا ہے، جنہیں وقت مقررہ کے اندر تحقیقات مکمل کر کے۱۵ دن کے اندر رپورٹ پیش کرنے کی ہدایت دی گئی ہے۔
الزامات کے بعد طلبہ نے سوپور قصبے میں احتجاج کیا اور لیکچرر کے خلاف سخت کارروائی کا مطالبہ کیا۔
اس دوران مبینہ ہراسانی کے خلاف احتجاج کے پیش نظر سوپور میں حکام نے پیر کے روز تعلیمی اداروں میں تدریسی سرگرمیاں معطل کرنے کا حکم دیا ہے۔
ایڈیشنل ڈپٹی کمشنر سوپور، ایس اے رینہ نے بتایا کہ گورنمنٹ ہائر سیکنڈری اسکول، بوائز ہائر سیکنڈری اسکول اور گورنمنٹ ڈگری کالج سوپور میں۱۵؍ ؍اپریل سے۱۸؍ اپریل تک تعلیمی سرگرمیاں معطل رہیں گی۔
رینہ نے کہا کہ یہ فیصلہ علاقے میں امن و قانون کی صورتحال برقرار رکھنے کے لیے احتیاطی اقدام کے طور پر لیا گیا ہے، کیونکہ طالبہ کے ساتھ مبینہ ہراسانی کے خلاف احتجاج جاری ہے۔
