صفائی ملازمین کے مفادات کا تحفظ حکومت کی ترجیح: ریکھا گپتا

نئی دہلی، 06 اپریل (یو این آئی) دہلی کی وزیر اعلیٰ ریکھا گپتا نے پیر کو کہا کہ صفائی ملازمین شہر کو صاف ستھرا اور منظم رکھنے میں اہم کردار ادا کرتے ہیں، اس لیے ان کے مفادات کا تحفظ حکومت کی ترجیح ہے۔
محترمہ گپتا نے پیر کو ‘مکھیا منتری جن سیوا سدن’ میں دہلی میونسپل کارپوریشن کے صفائی ملازمین کی یونین کی کور کمیٹی کے نمائندوں کے ساتھ بات چیت کی۔ اس بات چیت میں مختلف یونینوں کے نمائندوں نے شرکت کی اور اپنے مسائل، تجاویز اور زمینی سطح پر درپیش مشکلات کو کھل کر سامنے رکھا۔ بات چیت کے دوران صفائی ملازمین کی بھرتی اور ان کو مستقل کرنے کا معاملہ سرِفہرست رہا۔ اس کے علاوہ ملازمین نے جائے کار پر تحفظ کی کمی، تنخواہ سے متعلق مسائل اور ملازمت سے وابستہ دیگر پریشانیوں پر بھی بات کی۔
انہوں نے یقین دلایا کہ دہلی حکومت ان کے ساتھ مضبوطی سے کھڑی ہے۔ انہوں نے کہا کہ صفائی ملازمین شہر کو صاف ستھرا اور منظم رکھنے میں کلیدی کردار ادا کرتے ہیں، لہٰذا ان کے مفادات کی حفاظت کرنا حکومت کی اولین ترجیح ہے۔ انہوں نے واضح کیا کہ ملازمین کے مسائل کے حل کے لیے حکومت ٹھوس اور عملی اقدامات کرے گی۔
وزیر اعلیٰ نے متعلقہ محکموں کو ہدایت دی کہ یونین کی طرف سے اٹھائے گئے تمام مسائل کا جائزہ لے کر ضروری کارروائی کی جائے تاکہ ملازمین کو کام کا بہتر ماحول، تحفظ اور احترام مل سکے۔ انہوں نے کہا کہ دہلی حکومت ایک حساس اور ذمہ دار انتظامیہ کے طور پر کام کرتے ہوئے یہ یقینی بنائے گی کہ صفائی ملازمین کے حقوق کا تحفظ ہو اور ان کے معیارِ زندگی میں مثبت بہتری آئے۔