ایجنسیز
جموں؍۶؍ اپریل
جموں و کشمیر اینٹی کرپشن بیورو (جے کے اے سی بی)، جموں نے ایک مقدمہ ایف آئی آر نمبر۳۰/۲۰۲۶زیر دفعع۷؍انسدادِ بدعنوانی ایکٹ‘۱۹۸۸ درج کیا ہے، جس میں ایک سرکاری ملازم دیس راج، جونیئر اسسٹنٹ تعینات محکمہ سماجی بہبود، بلاور، ضلع کٹھوعہ کے خلاف شکایت کنندہ سے غیر قانونی رشوت طلب کرنے اور وصول کرنے کے الزام میں کارروائی کی گئی ہے۔
جاری بیان کے مطابق، مذکورہ سرکاری ملازم نے شکایت کنندہ سے دس ہزار روپے رشوت کا مطالبہ کیا تاکہ اس کی بیٹی کی شادی کے لیے ریاستی میرج اسسٹنس اسکیم کے تحت امداد جاری کی جا سکے، جس کی شادی۱۶؍اپریل ۲۰۲۶کو طے ہے۔
مذکورہ ملزم نے بعد ازاں بات چیت کے بعد۵ہزار روپے رشوت لینے پر رضامندی ظاہر کی۔ شکایت کنندہ پہلے ہی۱۵۰۰ روپے رشوت کے طور پر ادا کر چکا تھا اور اب دوبارہ بات چیت کے بعد ملزم مزید۳۰۰۰ روپے کا مطالبہ کر رہا تھا تاکہ۵۰ہزار روپے کی امداد جاری کی جا سکے۔ چونکہ شکایت کنندہ رشوت ادا نہیں کرنا چاہتا تھا، اس لیے اس نے قانون کے تحت کارروائی کے لیے اینٹی کرپشن بیورو سے رجوع کیا۔
شکایت موصول ہونے پر ایک خفیہ جانچ کی گئی جس میں متعلقہ سرکاری ملازم کی جانب سے رشوت طلب کرنے کی تصدیق ہوئی، جس کے بعد پولیس اسٹیشن اے سی بی جموں میں ایف آئی آر نمبر۰۳/۲۰۲۶زیر دفعہ۷؍ انسدادِ بدعنوانی ایکٹ‘۱۹۸۸ درج کر کے تحقیقات شروع کی گئیں۔
تحقیقات کے دوران ایک ٹریپ ٹیم تشکیل دی گئی، جس نے کامیاب کارروائی کرتے ہوئے ملزم کو شکایت کنندہ سے رشوت لیتے ہوئے رنگے ہاتھوں گرفتار کر لیا۔ یہ کارروائی آزاد گواہوں کی موجودگی میں انجام دی گئی۔ ملزم کو قانونی تقاضے پورے کرتے ہوئے موقع پر ہی گرفتار کیا گیا، جبکہ رشوت کی رقم بھی اس کے قبضے سے برآمد کر لی گئی۔
مزید برآں، مجسٹریٹ کی موجودگی میں ملزم کی رہائش گاہ، واقعہ کشن پور، بلاور، میں تلاشی بھی لی جا رہی ہے۔
بیان میں مزید کہا گیا ہے کہ اس کیس کی مزید تحقیقات جاری ہے۔
