بھارت کے دو مزید جہازوں نے آبنائے ہرمز کو محفوظ طریقے سے عبور کر لیا

نئی دہلی، 28 مارچ (یو این آئی) مغربی ایشیا کے بحران کے باعث خطے سے توانائی کی مختلف مصنوعات کی فراہمی متاثر ہونے کے درمیان ایک راحت بخش خبر آئی ہے کہ پیٹرولیم مصنوعات سے لدے ہندوستان کے دو مزید تجارتی جہازوں نے آبنائے ہرمز کو محفوظ طریقے سے عبور کر لیا ہے۔ اس سے قبل بھی ہندوستان کے ایل پی جی سے لدے چار ٹینکر آبنائے ہرمز کے راستے سے وطن واپس آ چکے ہیں۔
ذرائع کے مطابق، پیٹرولیم مصنوعات سے لدے ہندوستانی پرچم والے دو تجارتی جہازوں نے آبنائے ہرمز کو محفوظ طریقے سے پار کر لیا ہے۔ ہندوستانی بحریہ کے اس خطے میں تعینات جنگی جہاز ضرورت پڑنے پر ان جہازوں کی حفاظت کے لیے تیار رکھے گئے ہیں۔ تاہم، ان جہازوں کے نام، ان میں لدی مصنوعات اور ان پر سوار افراد کے بارے میں کوئی تصدیق شدہ معلومات نہیں دی گئی ہیں۔ ایران کئی بار یہ بات کہہ چکا ہے کہ وہ ہندوستان سمیت کچھ دوست ممالک کے جہازوں کو آبنائے ہرمز سے بغیر کسی رکاوٹ کے گزرنے دے گا۔
ہندوستان مغربی ایشیا کے بحران کے بعد سے خطے میں پھنسے اپنے تجارتی جہازوں کے محفوظ انخلاء کے لیے مختلف سطحوں پر متعلقہ فریقین کے ساتھ مسلسل رابطے میں ہے اور اسی کا نتیجہ ہے کہ بھارتی جہاز آہستہ آہستہ اس خطے سے نکلنے میں کامیاب ہو رہے ہیں۔ اس دوران، وزارت بندرگاہ، جہاز رانی اور آبی گزرگاہوں کے خصوصی سکریٹری راجیش کمار سنہا نے جمعہ کو ایک بریفنگ کے دوران تصدیق کی تھی کہ خلیجی خطے میں تمام ہندوستانی ملاح (کرو ممبرز) محفوظ ہیں۔ انہوں نے کہا تھا، "گزشتہ 24 گھنٹوں میں خلیجی خطے میں ہندوستانی پرچم والے جہازوں یا ملاحوں سے متعلق کوئی واقعہ رپورٹ نہیں ہوا ہے۔ 20 جہازوں پر سوار تمام 540 ملاح محفوظ ہیں۔ ڈائریکٹر جنرل شپنگ کے کمیونیکیشن سینٹر نے، جو 24 گھنٹے فعال رہتا ہے، 98 کالز اور 335 ای میلز کا تصفیہ کیا اور 25 ہندوستانی ملاحوں کی بحفاظت وطن واپسی میں مدد کی۔”
ہندوستان کے ایل پی جی سے لدے چار ٹینکر ‘شوالک’، ‘نندا دیوی’، ‘پائن گیس’ اور ‘جگ وسنت’ پہلے ہی ہرمز کو پار کر کے ملک پہنچ چکے ہیں۔ قابل ذکر ہے کہ امریکہ اور اسرائیل کے ایران پر مشترکہ حملوں کے بعد سے ایران نے مغربی ایشیائی ممالک سے پیٹرولیم مصنوعات لے کر آنے والے جہازوں کے لیے آبنائے ہرمز کے مصروف ترین راستے کو بند کر رکھا ہے۔ ایران نے جمعہ کو بھی تین جہازوں کو ہرمز عبور کرنے سے روک دیا تھا اور انہیں واپس بھیج دیا تھا۔