ایران نے امریکی ایف 15 لڑاکا طیارے کو مار گرانے کی ویڈیو جاری کردی

تہران، 23 مارچ (یو این آئی) ایرانی ٹی وی نے دفاعی نظام کی جانب سے ایف 15 لڑاکا طیارے کو نشانہ بنانے کی ویڈیو جاری کر دی ہے۔
ایرانی میڈیا کے مطابق ایف 15 طیارے کو گزشتہ روز آبنائے ہرمز کے قریب نشانہ بنایا گیا۔ تاہم اسرائیلی اور امریکی جاسوس ڈرونز کی پروازیں جاری ہیں۔ ایرانی میڈیا نے ایران کے مشترکہ فضائی دفاعی کمانڈ کے بیان کا حوالہ دیتے ہوئے کہا کہ جنگی طیارے کو ملک کے جنوبی ساحل اور جزیرہ ہرمز کے قریب نشانہ بنایا گیا۔
بیان میں کہا گیا کہ طیارے نے نشانہ بنائے جانے سے قبل ایک میزائل داغا تھا، جس کے بعد ایرانی فضائی دفاعی نظام نے اسے ہدف بنایا۔ رپورٹ کے مطابق طیارے سے متعلق مزید معلومات حاصل کی جارہی ہیں۔
دوسری جانب ایرانی ٹی وی نے یہ دعویٰ بھی کیا ہے کہ امریکی جہاز ایف-35 پر حملے کے بعد وسطی ایران پر فضائی حملے کم ہوگئے ہیں۔
واضح رہے کہ 28 فروری کو ایران پر امریکی و اسرائیلی مشترکہ حملے شروع کئے گئے، جن کے نتیجے میں ایران میں سابق رہبر اعلیٰ آیت اللّٰہ خامنہ ای سمیت اب تک 1300 سے زائد افراد شہید ہوچکے ہیں۔ ایران نے اس کے جواب میں اسرائیل کے ساتھ ساتھ اردن، عراق اور خلیجی ممالک میں امریکی فوجی تنصیبات کو نشانہ بناتے ہوئے ڈرون اور میزائل حملے کیے ہیں۔