سعودی عرب نے 4 ایرانی میزائل اور 2 ڈرون تباہ کردیے

ریاض، 6 مارچ (یو این آئی) سعودی عرب نے الخرج اور مشرقی صوبے میں چار ایرانی میزائل اور دو ڈرون تباہ کردیے، جس میں ۔ایک کروز میزائل بھی شامل ہیں۔
تفصیلات کے مطابق مشرقِ وسطیٰ میں جنگ کے سائے گہرے ہوتے جا رہے ہیں، گزشتہ شب سعودی عرب، قطر، بحرین اور اردن میں بڑے پیمانے پر میزائل اور ڈرون حملوں کو ناکام بنایا گیا ہے، ان حملوں میں اہم فوجی اڈوں اور سفارتی تنصیبات کو نشانہ بنانے کی کوشش کی گئی۔
سعودی وزیر دفاع نے سوشل میڈیا پلیٹ فارم ‘ایکس’ پر تصدیق کی ہے کہ سعودی فورسز نے الخرج اور مشرقی صوبے میں بڑی کارروائی کرتے ہوئے چار میزائل اور دو ڈرونز تباہ کیے۔
پرنس سلطان ایئربیس: الخرج گورنری میں واقع پرنس سلطان ایئربیس کی جانب تین بیلسٹک میزائل داغے گئے تھے جنہیں فضا میں ہی تباہ کر دیا گیا۔
الخرج میں ایک کروز میزائل اور مشرقی ریاض میں تین ڈرونز بھی مار گرائے گئے۔
دوسری جانب بحرین کے دارالحکومت منامہ میں اسرائیلی سفارتخانے کو نشانہ بنانے کی کوشش کی گئی۔ ڈرون کے ذریعے ‘فنانشل ہاربر ٹاورز’ میں واقع کمرشل کمپلیکس پر حملہ کیا گیا، تاہم خبر رساں ادارے ‘رائٹرز’ کا کہنا ہے کہ ایرانی ڈرونز کو کمپلیکس تک پہنچنے سے پہلے ہی تباہ کر دیا گیا۔
قطری وزارتِ دفاع کے مطابق ایئر ڈیفنس سسٹم نے العدید ایئربیس پر حملہ آور ڈرون کو کامیابی سے مار گرایا۔
قطری حکام نے احتیاط کے طور پر شہریوں کو گھروں میں رہنے کی ہدایت جاری کی ہے۔
‘الجزیرہ’ کے مطابق اردن کے شہر اربد میں متعدد ڈرونز گرائے گئے ہیں تاہم عراقی مسلح گروپ نے ان حملوں کی ذمہ داری قبول کرنے کا دعویٰ کیا ہے۔