بنگلہ دیش میں عام انتخابات: جماعت اسلامی نے ہندو برادری سے تعلق رکھنے والے امیدوار کو ٹکٹ جاری کردیا

ڈھاکہ، 9 فروری (یو این آئی) بنگلہ دیش جماعت اسلامی نے ملک میں 12 فروری کو ہونے والے عام انتخابات میں ہندو برادری سے تعلق رکھنے والے تاجر کو بھی ٹکٹ جاری کردیا۔
حلقہ انتخاب کھلنہ-1 سے جماعت اسلامی کے امیدوار کرشنا نندی نے کہا ہے کہ اگر جماعتِ اسلامی اقتدار میں آتی ہے تو بنگلہ دیش کے ہندو شہری محفوظ اور باعزت زندگی گزاریں گے۔
ان کا کہنا تھا کہ اسلامی سیاسی جماعتوں اور اقلیتوں کے حقوق سے متعلق پائے جانے والے خدشات بے بنیاد ہیں۔
عرب میڈیا میں شائع ہونے والے اپنے مضمون میں کرشنا نندی نے کہا کہ ایک اسلامی جماعت کی جانب سے کسی ہندو کو امیدوار بنانا اس بات کا ثبوت ہے کہ جماعتِ اسلامی مذہبی اقلیتوں کی نمائندگی اور ان کے تحفظ کی صلاحیت رکھتی ہے۔
انہوں نے دعویٰ کیا کہ جماعتِ اسلامی کی حکومت میں کسی ہندو کو ملک چھوڑنے یا ہندوستان ہجرت کرنے پر مجبور نہیں کیا جائے گا اور قانون و انصاف کے ذریعے مساوی شہریت کو یقینی بنایا جائے گا۔
انہوں نے بتایا کہ وہ 2003 میں جماعتِ اسلامی میں اس لیے شامل ہوئے کیونکہ وہ جماعت کی نظم و ضبط، جواب دہی اور اخلاقیات پر مبنی سیاست سے متاثر تھے۔
جولائی 2024 میں ہونے والے بدامنی کے واقعات کا حوالہ دیتے ہوئے کرشنا نندی نے دعویٰ کیا کہ جماعتِ اسلامی کے کارکنان نے اقلیتی برادریوں کے تحفظ اور مندروں و عبادت گاہوں کی حفاظت میں کردار ادا کیا۔