جوکووچ اے ٹی پی رینکنگ میں تیسرے نمبر پر پہنچ گئے

ملبورن، 3 فروری ( یو این آئی )آسٹریلین اوپن کے فائنل تک رسائی حاصل کرنے والے سربین اسٹار نوواک جوکووچ ایک درجہ ترقی پا کر اے ٹی پی رینکنگ میں تیسرے نمبر پر پہنچ گئے ہیں تاہم فائنل میں انہیں ہسپانوی کھلاڑی کارلوس الکاراز کے ہاتھوں شکست کا سامنا کرنا پڑا۔الکاراز نے ملبورن میں شاندار تاریخ رقم کرتے ہوئے آسٹریلین اوپن میں کامیابی کے ساتھ کیریئر گرینڈ سلیم مکمل کر لیا۔ 22 سالہ ہسپانوی کھلاڑی کے ٹرافی جیتنے کے ساتھ ساتھ دیگر کئی کھلاڑیوں نے بھی اے ٹی پی رینکنگ میں نمایاں بہتری حاصل کی۔
جوکووچ نے آسٹریلین اوپن میں اپنے کیریئر کا 38واں گرینڈ سلیم فائنل کھیلا، تاہم وہ ریکارڈ 25واں گرینڈ سلیم اور ملبورن میں 11واں خطاب جیتنے میں ناکام رہے۔ انہوں نے سیمی فائنل میں اٹلی کے جانک سنر کو شکست دے کر ومبلڈن 2024 کے بعد پہلی مرتبہ کسی گرینڈ سلیم فائنل میں جگہ بنائی تھی، جہاں ایک بار پھر انہیں الکاراز سے شکست ہوئی۔ یہ اگست 2024 کے بعد پہلا موقع ہے جب 38 سالہ جوکووچ اے ٹی پی رینکنگ کے ٹاپ تھری میں واپس آئے ہیں۔
دوسری جانب 20 سالہ امریکی کھلاڑی لرنر ٹین نے پانچ درجے بہتری کے ساتھ کیریئر کی بلند ترین 24ویں پوزیشن حاصل کر لی ہے۔ وہ 2002 کے بعد کسی گرینڈ سلیم کے کوارٹر فائنل میں پہنچنے والے سب سے کم عمر امریکی مرد کھلاڑی بن گئے۔
آسٹریلین اوپن میں عمدہ کارکردگی کے بعد ارجنٹائن کے ٹامس مارٹن ایچویری بھی اے ٹی پی رینکنگ میں آٹھ درجے اوپر آ گئے ہیں۔ 26 سالہ کھلاڑی نے ٹورنامنٹ میں دو میچ جیتے، جن میں میومیر کیکمانووچ کے خلاف پانچ سیٹوں پر مشتمل سنسنی خیز فتح شامل ہے، تاہم بعد ازاں انہیں الیگزینڈر بوبلک کے ہاتھوں شکست کا سامنا کرنا پڑا۔