ای سگریٹ کیس میں کارروائی ہوگی: برلا

نئی دہلی، 12 جنوری (یو این آئی) لوک سبھا کے اسپیکر اوم برلا نے کہا ہے کہ اگر ایوان میں ای سگریٹ کے مبینہ استعمال سے متعلق الزامات درست ہیں تو انہیں برداشت نہیں کیا جائے گا اور ملزمین کے خلاف کارروائی کی جائے گی۔
بدھ کو یہاں شروع ہونے والی دولت مشترکہ پارلیمانوں کے اسپیکروں اور پریزائیڈنگ افسروں کی 28ویں کانفرنس کے بارے میں جانکاری دینے کے لیے پیر کو پارلیمنٹ ہاؤس انیکسی میں ایک پریس کانفرنس سے خطاب کرتے ہوئے مسٹر برلا نے ایک سوال کے جواب میں کہا کہ پارلیمانی کارروائی قواعد و ضوابط کے تحت چلتی ہے، اور تمام اراکین پارلیمنٹ کو ان کی پابندی کرنی چاہیے۔
انہوں نے کہا کہ ہندوستان دنیا کی سب سے بڑی جمہوریت ہے، اور مختلف مسائل پر اتفاق اور اختلاف فطری ہے، لیکن کسی بھی معاملے کی مخالفت ایوان میں صرف ضابطوں کے اندر ہی کی جا سکتی ہے۔ پارلیمنٹ میں اخلاق اور مریادہ کو برقرار رکھنا سب کی ذمہ داری ہے۔
یہ پوچھے جانے پر کہ ای سگریٹ کے استعمال سے متعلق شکایت پر کیا کارروائی کی جائے گی، مسٹر برلا نے سخت انتباہ جاری کرتے ہوئے کہا کہ انہیں شکایت موصول ہوئی ہے اور اس کی جانچ جاری ہے۔ تحقیقات مکمل ہونے کے بعد کارروائی کی جائے گی۔ جب ان سے پوچھا گیا کہ کیا جرم ثابت ہونے پر رکنیت منسوخ کی جاسکتی ہے تو انہوں نے کہا کہ ماضی میں بھی رکنیت منسوخ کی جاچکی ہے اور اگر تحقیقات میں قواعد کی خلاف ورزی کا انکشاف ہوا تو اس بار بھی رکنیت منسوخ کی جاسکتی ہے۔
قابل ذکر ہے کہ بی جے پی رکن انوراگ ٹھاکر نے اسپیکر کو ایک شکایت پیش کی تھی جس میں الزام لگایا گیا تھا کہ ترنمول کانگریس (ٹی ایم سی) کے ایک رکن ایوان میں کارروائی کے دوران ای سگریٹ کا استعمال کر رہے ہیں۔ اس شکایت کے جواب میں اسپیکر نے کہا کہ معاملہ زیر تفتیش ہے اور تحقیقات مکمل ہونے کے بعد کارروائی کی جائے گی۔
پارلیمنٹ کے بجٹ اجلاس کے دوران یکم فروری کو اتوار ہونے کے سوال کے بارے میں انہوں نے کہا کہ 2026-27 کا بجٹ یکم فروری کو پارلیمنٹ میں پیش کیا جائے گا، چاہے دن کوئی بھی ہو۔ انہوں نے کہا کہ ہماری پارلیمنٹ کام پر یقین رکھتی ہے اور جب ضروری ہو تو ارکان پارلیمنٹ دیر سے بیٹھتے ہیں۔ انہوں نے کہا کہ اس بار بجٹ یکم فروری بروز اتوار پیش کیا جائے گا۔